Туслахын хэрэг буюу "Жэнко" Х.Баттулгад улам ойртсоор...
Хууль хүчнийхэн төмөр замын хэргийн гол сэжүүр лүү улам ойртсоор байна. Өчигдөрхөн УИХ-ын гишүүн Х.Баттулгын туслах Г.Түвшинжаргалыг Эрүүгийн цагдаагийн газрын Эдийн засгийн гэмт хэрэгтэй тэмцэх албанаас саатуулсан нь шуугиан тарьсан. Цагдан хорих 461-р ангид хоригдож буй түүнийг үргэлжлүүлэн хорих эсэхийг шийдэх шүүх хурал яг одоо Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд эхлэх гэж байна. Шүүх хуралдааныг хэвлэлийнхэнд хаалттай явуулах шийдвэр гарсан байна. Шүүх хурлын танхимд УИХ-ын гишүүн Х.Баттулга болон түүний өмгөөлөгч Д.Пүрэвбаатар, УИХ-ын гишүүн Х.Баттулгын туслах Л.Түвшинжаргалын нөхөр болон хүүхдүүд нь ирээд байгаа аж. Г.Түвшинжаргалыг ямар үндэслэлээр саатуулсан талаар түүний өмгөөлөгч Д.Пүрэвбаатараас тодруулахад “Гэрт нь хөндлөнгийн гэрчгүйгээр гэнэт нэгжлэг хийж эд зүйлийг нь хурааж авсан. Уг нь хуулиараа хоёроос доошгүй хөндлөнгийн гэрч байх ёстой. Үйлчлүүлэгч маань ой гарантай хөхүүл хүүхэдтэй. Хүүхдэд нь эмчилгээ асаргаа шаардлагатай байгаа. Шүүхээс өмгөөлөгч нарыг нь оролцуулж мэтгэлцүүлж байж шүүх хурал хийе гэсэн шийдвэр гаргасан. Өнөөдөр болох шүүх хурлаар үргэлжлүүлэн хорих эсэхийг шийднэ” хэмээсэн.
