Нууц мэдээллийн уурхай

 Урьд нь хэдэнтээ ял шийтгэгдэж байсан Дорнод аймгийн харьяат, хатагин овгийн Ж.Ч гэдэг лам үзмэрч нь мэдэгдэхгүй эр "шившлэг хийнэ, үрж болохгүй" гээд хоёр сая төгрөг авчруулсан ч улайн цайм аваад зугтаасан хэрэг үйлджээ. Хохирогч Цацал гэгчийг бүр хүүхэд хуурж мянга алхаад газар юм булаад зан үйл үйлдээд ир гэж явуулаад тэр хооронд нь хадганд ороосон хоёр сая төгрөгийг нь аваад талийжээ. Хохирогч болсон явдлын тухай "...Би юм үздэг Чин....гэдэг лам ахад Булган аймгийн шоронд байхад нь очиж үзүүлдэг байсан юм. 9820.....дугаараас залгаж чамд засал хийх хэрэгтэй байна. Би Улаанбаатар хотод байгаа гэж хэлсэн. Орой нь  20 цагийн үед Баянгол дүүргийн 9 дүгээр хороонд орших манай гэрт ирээд  2.000.000 төгрөг бэлд шившлэг хийгээд өгнө, долоо хоногийн дараа үрж болно гэхээр нь би АТМ-ээс нэг саяыг аваад бэлэн байсан мөнгөтэйгөө нийлүүлэн хоёр сая болгоод өгсөн. Лам гурил зуурч зан үйл хийгээд байсан.  Тэр гурилаа надад өгөөд чи хойшоо гарч мянга алхаад наад зүйлээ бул, би урагш 600 алхаад буцаад эндээ уулзъя гэсэн. Би  хойшоо алхаад буцаад ирэхэд  лам алга болсон.  Гэртээ ороод хадагтай мөнгөө үзэхэд бас л байхгүй  байсан. Тэгээд утас руу нь залгахад  холбогдох боломжгүй болсон. Би лам хүн зүгээр биз өгөх байх гээд орхисон. Сар гаруй хугацааны дараа  над руу залгаж “миний дүү сайн хүүхэд байна. Намайг цагдаад хэлээгүй” гээд “чиний хоёр сая төгрөг надад байна, шившлэг хийсэн учир үрж болохгүй байна. Одоо надад эмчилгээний 80 мянга  хэрэгтэй байна гэхээр нь би итгээд Анх гэсэн хүний Хаан банкны  данс руу шилжүүлсэн. Орой нь уулзаж миний мөнгийг өгнө гэсэн боловч утас нь холбогдохгүй болсон тул хэд  хоног харж байгаад цагдаад өргөдөл өгсөн" гэжээ.  Харин шившлэгтэй мөнгө аваад бултсан ламтан "....надад үзүүлдэг байсан дүү  Япон улсаас жаахан юм оруулж ирсэн чинь мөнгө төгрөг болохгүй байна  гэсэн. Би мөнгийг нь аравнайлж шившиж өгнө гээд  хоёр сая  төгрөгийг хадганд боолгож авсан.  Баатарсайхан гэдэг залуутай хамт очсон.  Тэгээд би нөгөө залууд энийг барьж бай гэтэл мөнгийг аваад зугтаасан. Би эхнэр дээр нь очиж хэлэхэд мэдэхгүй, хэд хоног гэртээ ирээгүй гэж  хэлсэн.  Би Баатарсайханд мөнгөө алдсан" гэж мэлзжээ.