50 Cent мөнгөнд умбасан зураг оруулаад татварынханд ээрүүлжээ
Нийтэлсэн: 2016-03-10 06:42:57
Өнгөрсөн жил бараг л дампуурснаа зарлаж татварынханд ямарч мөнгөгүй болсоноо хэлэн уйлах дөхөж байсан реппер 50 Cent шал ороор нэг хөглөрсөн долларонд умбасан зургаа цахим сүлжээнд оруулаад баларчээ. Татварын маш их өртэй түүнийг Арбитрын шүүхээс дуудаж хаанаас тийм их мөнгөтэй болсоныг нь асууж шалгаасан гэнэ. Хуулийнхан түүнийг ахиад л орлогоо нуун дарагдуулсан хэмээн сэжиглэж байгаа бол сандарсан реппер хуурамч мөнгө байсан хэмээн тайлбарлаад улам бурууджээ. Америкд кинонд зориулан хуурамч мөнгө ашиглах шаардлага гарвал зөвшөөрөл хяналтын дор хийгддэг журамтай аж. Гэтэл Cent энэ талаар тодорхой юм хэлж чадсангүй тул эргээд ороогдсон гэнэ. Сүүлдээ хамаг үнэнээ хэлж энэ бол ердөө л пиар байсан, шүтэн бишрэгчиддээ миний бүх зүйл ОК гэдгийг л харуулах гэсэн юм хэмээн шалдаа буужээ. Гэсэн ч шүүх итгээгүй агаад репперын санхүүд ахин шалгалт хийхийг татварынханд зөвшөөрчээ. Өмнө нь реппер эр Ластония Левистон гэдэг эмэгтэйд бэлгийн дарамт үзүүлсэн хэрэгтээ есөн сая долларын нөхөн төлбөр төлөх шийтгэл шүүхээс хүлээсний дараа дампуурснаа зарласан. Хохирогч эмэгтэй одоо болтол төлбөрөө бүрэн аваагүй хэмээн бас гомдол гаргажээ.
