Нууц мэдээллийн уурхай

Чечений Борзой суурингийн дэргэд байдаг цэргийн ангид орос цэргүүд болон нутгийн иргэдийн хооронд маш том зодоон болжээ. Зодооны үеэр буудалцсан байна. Болсон явдлыг зохицуулахаар БХЯ-ны сайд С.Шойгугийн тушаалаар Өмнөд цэргийн тойргийн командлагч нь Чечень лүү яаралтай ниссэнээс үзэхэд үндэстэн хоорондын мөргөлдөөн дэгдэхэд ч ойрхон байсан аж. Чеченьчүүдийн эх сурвалжийн мэдээгээр тус цэргийн ангид орос болон бусад үндэстний цэргүүд тус тусдаа ширээнд сууж хооллодог гэнэ. Хоолны үеэр оросуудын ширээний зүгээс чеченьчүүдийг бүдүүлгээр доромжилсон зүхсэн хараал сонсогджээ. Оросын цэргийн офицерүүд ч үүнийг дэмжин турхирсан гэнэ. Хоолны дараа ангиараа жагсах үед доромжлуулсан чечень болон бусад үндэстний цэргүүд оросууд луу дайрчээ. Орос цэргийн ангид чеченьчүүдийг дээрэлхэн доромжилсон тухай мэдээ тэр дороо сууринд тархахад нутгийн иргэд үндэс угсаа нэгтнүүдээ хамгаалан мод чулуугаар зэвсэглэн цэргийн анги руу очсон байна. Зодоонд оросууд ялагдаж ангиараа таран зугтжээ. Нэлээд хэдэн орос цэрэг хэмх нүдүүлжээ. Дарга нар нь анхааруулан дээшээ буудсан ч чеченьчүүдийг тарааж чадаагүй аж. Болсон үйл явдал нь Оросын цахим ертөнцийн шуугиан дэгдээлээ. “Манайд үндэстэн хоорондын найрамдал гэдэг нь шал худлаа болсон. Үнэндээ хэн нь ч хэндээ итгэдэггүй, боломж гарах л юм бол бие биенээ тас татахад бэлэн байдаг” гэсэн бол “Оросууд урьдын адил эхэлж дээрэлхэж доромжилсон. 2015 оныг Путин эх орончдын жил гэж зарласан нь ердөө Оросын үндсэрхэг үзлийг сэргээх дэвэргэх л зорилготой байсан” хэмээн бичиж байна. Мөн  “Энэ зодоон нь Путин Кадыров хоёрын харилцааны жинхэнэ үнэн нүүр царайг харууллаа” гэх зэргээр шуугиж байна.