53 сая долларын өрөнд орсон Канье Уэст Цукурбергээс тусламж гуйжээ
Нийтэлсэн: 2016-02-16 02:48:30
Алдарт дива Ким Кардашьяны нөхөр реппер Канье Уэст 53 сая долларын өрөнд ороод арга ядахдаа Фэйсбуукийг үндэслэгч Марк Цукурбергээс тусламж гуйжээ. Гэхдээ өөрийгөө үнэлэх үнэ цэнээ алдсангүй. Тэрээр Цукурбергэд “энэ цаг үеийн хамгийн алдарт уран бүтээлч болох миний аугаа санааг нэг ТЭРБУМ доллароор санхүүжүүлэхийг” санал болгосон гэнэ. Шинээр бэлдсэн “Life of Pablo” цомгийг нь гаргахад үнэхээр хөрөнгө мөнгө дутжээ. Дээр нь өр нь нэхэгдээд тун хүнд байдалд орсоноо ч нуусангүй. Реппер эр өрөнд орсон шалтгаанаа даян дэлхийн тусын төлөө асар их хөрөнгө зарцуулсан хэмээн сэтгэл уярмаар сайхан тайлбарлажээ. Тэрээр дэлхийн хамгийн залуу тэрбумтанаас мөнгө салгахын тулд биеэ магтахдаа үг хайрласангүй. “Би бол урлагдаа спортын Майкл Жордан л гэсэн үг” хэмээн өөрийгөө дөвийлгөсөн гэнэ. Мөн өөрт нь ахиад 10 Гремми авах чадал боломж байгааг ч сануулаад авчээ.
