Өмнөд Солонгосын тагнуулын алба Ким Чен Ыныг засгийн эрхээс унагах төлөвлөгөө боловсруулжээ
Хойд Солонгосын зүгээс цөмйн аюул заналхийлэл улам бүр нэмэгдэхийн хэрээр Өмнөдийнхөн хамгаалалтын боломжит бүхий л арга хэлбэрийг ашиглаж эхэлжээ. Түүний нэг нь Хойдын аюулыг нутагт нь номхотгох буюу дотоодод нь эсэргүүцэл сөргөлдөөн дэгдээх замаар эрх баригчдыг нь солих явдал гэнэ. Өмнөд Солонгосын парламентийн Гадаад бодлого аюулгүй байдлын хорооны дарга На Ген Вон “Эцсийн эцэст бид Хойд Солонгосын эрх баригчдыг ард түмнийх нь гараар унагах хувилбарыг авч үзэх цаг болсон. Энэ нь маш хэцүү төвөгтэй зорилт ч улам бүр хурцдаж байгаа нөхцөл байдал боломжит бүхий л арга хэлбэрийг ашиглахыг шаардаж байна” гэжээ. Хэдийгээр Хойд Солонгос нь гадна талд их удирдагчаа нягт тойрон хүрээлэн ч бат бэх улс мэт харагддаг ч дотроо зөрчил тэмцэлд идэгдээд эхэлсэн гэнэ. Өмнөдийн тагнуулын албаны мэдээллээр олон нийт ялангуяа армийн дээд удирдлагын түвшинд эрх баригчдаа шүүмжлэх явдал гардаг болжээ. Үүний баталгаа нь байсхийгээд л хийгддэг цэвэрлэгээ цаазлалт хэмээн тагнуулын албаны тайланд дурджээ. Ким Чен Ын төрд “тэрслэгчид”-ийг маш хатуугаар шийтгэн ихэнхи тохиолдолд шууд цаазалдаг нь цаагуураа эсэргүүцэл дургүйцлийг улам дэврээх болсон гэнэ.
