Дэлхийн хамгийн авлигажисан ерөнхийлөгчийг тодруулжээ
Эрэн сурвалжилах чиглэлийн нэрт ”Unmask the Corrupt” сайт дэлхийн хамгийн их авлигал авсан, авлигажисан төрийн бүтэц бий болгосон удирдагч нарыг тодруулжээ. Сайт бүтэн сарын турш хандагч нараасаа санал асуулга авсан агаад 132,6 мянган саналаар Украйны экс ерөнхийлөгч, өдгөө Оросд орогнож байгаа Виктор Янукович тэргүүлжээ. Тэрээр төрийн тэргүүний алба хаших хугацаандаа маш их авлигал авч 10 сая долларын үнэтэй харшид амьдарч, төрийн өмчийг хувьчилах нэрээр зарж асар их баяжжээ. Сүүлдээ үймээнээр далимдуулан хууль хяналтын байгууллагаас зугтаан Оросд орогнол эрэн очсон. Дэд байранд Бразилийн газрын тосны төрийн өмчит Petrobras компани 115 мянган саналаар удаалжээ. Энэ компаний бүхий л үйл ажиллагаа нь авлигал өгөх авах замаар явагддаг нь олон нийтэд илт болсон. Гуравдугаар байранд Панам улсын ерөнхийлөгч асан Рикардо Мартинелли 105 мянган саналаар орсон байна. Дөрөвдүгээр байранд 90 мянган саналаар Оросын ерөнхийлөгч Путин шалгарчээ. Түүнийг 40 тэрбум долларын нууц хөрөнгөтэй тухай кино гарсан нь энэ шалгаруулалтанд “амжилттай” оролцоход нөлөөлжээ. Удаах байруудад Нигери, Хятад Филиппины төрийн өндөр дээд албан тушаалтнууд орсон байна.
