Нууц мэдээллийн уурхай

Энэ хүний явдал бол улстөр төрд ороод нэр төр, ажил хэргээрээ хэрхэн хохирдогийн бодит жишээ юм. Өдгөө өөрөө хэрэгт унаад байгаа бол харин түүний “дээлний захыг мушгисан” нөхдүүд сул чөлөөтөй явна. С.Ганбат гэдэг хүнийг сайн эмч гэдгээр нь дорнодчууд мэднэ. Гэтэл тэрээр “сайн дарга” болох гэж баз хүргэн хийгээд АН-ыг бужигнуулагсадын ятгалгаар улстөрд нь хамгийн их хор найрагддаг Дорнод аймгийн Засаг дарга бараг л “ногоон гэрлээр” болсон. С.Ганбатын аймгийн дарга болсон огцоруулсан нь тусдаа түүх юм. Харин энэ удаад аймгийн АН-ын тамгыг хуурамчаар үйлдэж улмаар түүнийгээ ашиглан намын санхүүжилт нэрээр хувь хүн, компаниудаас 50 сая төгрөг “босгосон”, хуурамч тамгаараа УДШ-ийг хуурсан зэрэг хэрэгт нь эрүүгийн хэрэг үүсгэн мөрдөн байцаалт явуулсан ухай юм. Улстөр мэдэхгүй эмч “улстөрчдийн” золиос болсон энэ хэргийг шүүх мөрдөн байцаалт руу буцаадаг, харин прокурор эсэргүүцэл бичдэг байсан. Тэгвэл хяналтын шатны шүүх саяхан С.Ганбатын хэргийн мөрдөн байцаалтын ажиллагаа бүрэн хийгдсэн тул шүүхээр хянан хэлэлцэгдэх ёстой хэмээн үзэж хэргийг анхан шатны шүүх руу буцаалаа. Ийнхүү экс даргын удтал дуншсан эрүүгийн хэргийг шүүх хянан шийдвэрлэхээр болжээ. Болсон үйл явдлыг дурдахад энэ нь амгалан тайван энэ хүнээс гарах санаа биш хэмээн аймгийнхан ярьдаг. Насаараа эмч хийсэн хүнээс хуурамч тамга хийх түүнийгээ ашиглах ухаан яагаад ч гарахгүй мэт. Харин цаана нь байгаа баз хүргэн гэх нөхөрд хамаг учир бий гэнэ. Тус аймгийн АН-ын хууль ёсны удирдлага нь аймгийн ИТХ-д суудаг Болдбаатар, Ганцогт нарыг эргүүлэн татах асуудлыг шүүхэд тавьж хоёр шатанд ялаад байсан. Энэ үед Засаг дарга С.Ганбат нь УДШ-д аймгийн АН-ын даргын нэрээр нэр бүхий хоёр төлөөлөгчийг эргүүлэн татах нэхэмжлэлээсээ татгалзлаа гэсэн албан тоотыг хуурамч тамга даран явуулж мэхэлсэн. Хууль ёсоор ИТХ-ийн төлөөлөгчөөс эргүүлэн татагдах учиртай Г.Болдбаатар нь тухайн үед Засаг даргын зөвлөх байсан гэхээр бүхий учир ойлгогдож байна.  Энэ хүний аймгийн АН, аймгийн улстөрийг бужигнуулахад оруулсан “хувь нэмрийг” дорнодчууд сайн мэднэ. Ийнхүү бохир улстөрд хутгалдсаны төлөө экс дарга С.Ганбат эрүүгийн хэрэгт холбогдож хэрэг нь удахгүй шүүхээр шийдвэрлэгдэх гэж байна.

 

 

NUUTS.mn