Нууц мэдээллийн уурхай

Г.Шийлэгдамба намын даргаа нэр заасан захидал бичсэн, МАХН-ын ерөнхий нягтлан бодогч байцаагдсан зэрэг нь шадар сайдын албан тушаалд зугуухан шийдмэг зүтгэх Н.Энхбаярд огт саад садаа болохгүй бололтой. Эрүүл мэнд, спортын сайд асан Г.Шийлэгдамба намын дарга мөнгөний асуудалд шууд холбогдуулсан захидал бичиж шуугиан тарьсан.  Тэрээр намын даргынхаа шаардсанаар мөнгө өгч, улмаар дараагийнхаа мөнгийг О.Даваасүрэн гэх хүнээс авснаа илчлилсэн нь МАХН-ынханд багагүй чирэгдэл учруулж байгаа талаар эх сурвалж мэдээлсэн. Тэд өнгөрсөн амралтын өдөр нам дотроо дээрх захидалтай холбоотой асуудлаар хуралдсан байна. Баттай эх сурвалжийн мэдээлснээр, өнгөрсөн нэгдүгээр сарын 29-ний өдөр АТГ-аас МАХН-ын байранд нэгжлэг хийж, ерөнхий нягтлан бодогч Ц-г баривчилжээ. Улмаар түүнээс байцаалт авч, шөнө сулласан гэх мэдээлэл ч байна. Түүнийг баривчлах болсон шалтгаан нь Г.Шийлэгдамбын захидалтай холбоотой бололтой. Дээрх захидалтай зэрэгцэн тус намын нарийн бичгийн дарга нар солигджээ. Даргын ажлын алба хариуцсан Нарийн бичгийн даргаар Ж.Сүхбаатар, Орон нутаг хариуцсан Нарийн бичгийн даргаар Б.Эрдэнэбилэг, Сургалт судалгаа хариуцсан Нарийн бичгийн даргаар Л.Алтанчимэг, Гадаад харилцаа хариуцсан Нарийн бичгийн даргаар С.Жаргал нарыг тус тус томилсон байна. Түүнээс гадна МАХН-ын дарга Н.Энхбаяр тэргүүтэй тус намын гишүүд Ерөнхий сайд Ч.Сайханбилэгтэй уулзаж, Шадар сайдын асуудлаар санал солилцсон мэдээлэл  цацагдсан. Үүний хамтаар МАХН-ын дарга өөрийн ТВ-ээрээ яриа өгч “намын нөхдийн шаардлагаар Шадар сайдын ажлыг гололгүй авах болсон” тухайгаа зарласан.

NUUTS.mn