Нууц мэдээллийн уурхай

Ерөнхий сайд Ч.Сайханбилэгийг огцруулах бичиг өргөн баригдлаа. Одооноос Шийдлийн Засгийн газрын “амь” сараар бус өдрөөр хэмжигдэж эхэлсэн гэсэн үг. Гэтэл АН-ын Р.Амаржаргал өргөх бичигт гарын үсэг зурснаасаа татгалзаж нэрээ татлаа. Энэ нь засгаа нэг ч гэсэн өдөр хамгаалж үлдэх гэсэн АН-ынханд бөөн олз биз. Гацаах буцаахдаа сайн УИХ-ын дарга З.Энхболд нэрээ татсан хүнийг хасалгүй оруулж ирсэн байна хэмээн өөлсөн. Энэ шалтгаанаар өргөх бичгийг буцааж магадгүй байна. Хоёр бие даагч, Г.Уянга болон  ХҮН-ын  дарга С.Ганбаатар, МАН-ын 13 гишүүн дээр нь АН-ын Р.Амаржаргал нэмэгдээд уг нь хорин хүн болсон. Одоо намын даргаасаа айсан АН-ын гишүүн нэрээ татсан ч хуулийн хүчинтэй тоо нь хэвээрээ үлдэнэ. Ерөнхий сайдыг АНЭУ-д айлчлах үеэрээ Оюутолгойн орд газрыг ашиглах гэрээний нэг тал Туркойз Хилл Ресурс болон Рио Тинто компанитай Оюутолгойн далд уурхайн бүтээн байгуулалтын төлөвлөгөөнд гарын үсэг зурахдаа УИХ-д мэдээлэлгүйгээр “далд уурхайн санхүүжилт” нэрээр Оюутолгойн ордыг ашиглах хөрөнгө оруулалтын гэрээ, ТЭЗҮ-ээр баталгаажсан далд уурхайн санхүүжилт 1.5 тэрбум долларын анхны хөрөнгө оруулалтын дүн дээр нэмж 4.7 тэрбум долларын зардлыг хүлээн зөвшөөрчээ” гэдгийг  дурдаад энэ нь Монгол Улсад төлсөн татвар бусад орлогын дүн нь жилийн нийт борлуулалтын орлогын дөнгөж 8-9 хувь болсон нь Монгол Улсын Ерөнхий сайдыг огцруулах үндэслэл гэж онцолсон. Энэ үйл явцын эхний шуугиан нь намдаа байнга шүүмжлэлтэй ханддаг Р.Амаржаргал гэнэтхэн “хайр зарлан” нэрээ татсан явдал байлаа. Бас нэг сонин зүйл МАН-ын идэвхигүй дэмжилт юм. МАН-ын 13 гишүүн гарын үсэг зурсан ч огцтруулах ажлаас анхнаасаа л хойшоо суусан.  Тэдний хувьд чуулганд оруулаад ирбэл 26-гуулаа дэмжинэ гэсэн нь л том “дэмжлэг” бололтой. Ардын намыхны хойшоо суун бие даагчид болон Г.Уянга нарыг хөөрөгдөөд байгаагийн шалтгаан нь “засаг самарсан” гэх нэр хочноос жийрхжээ. Ямар ч хэлбэрээр бодсон энэ нь өөртөө наахад тун таагүй нэр хаяг гэнэ. Сонгуулийн өмнө бол бүр ч хэрэггүй.  Ийм л учраас бие даагчид болон Г.Уянга нарын ард бүгээд нуугдаад байгаа аж. Ердөө засаг самарсан гэх нэр хочийг авахгүйн тулд урд жилийн уригдаж очоод хөөгдөж гарсан  “сэтгэлийн шарх”-аа ч дарж байна. “Хийхийн та нар хий, аахилахын бид аахилья” гэжээ.

NUUTS.mn