Өршөөлөөр суллагдсан этгээд “бушуухан буцаад шоронд орохын тулд хэрэг үйлдсэн” гэжээ
Нийтэлсэн: 2016-01-14 02:43:55
Монголд хуулийн дагуу зохих ялаа эдлээд гарч ирсэн хүнийг хүлээж авах нийгмийн болон олон нийтийн бэлтгэл боломж алга байна. Хуулийнхны хэллэгээр хохиохоос суллагдсан хүмүүсийг нийгэмшүүлж, ажилтай амьдарлтай болоход нь туслах нөлөөлөх арга хэлбэрийг бий болгох шаардлага байнга мэдрэгдсээр байна. Өршөөлийн хуулийн дагуу суллагдсан ч дахин гэмт хэрэг үйлдээд зугтсан иргэн Г-г Баянзүрх дүүргийн цагдаагийн II хэлтсийнхэн уржигдар барьжээ. Г нь өмнө нь гэмт хэрэг үйлдэн 10 жилийн ял сонссон бөгөөд ялын хугацаагаа хараахан дуусгаагүй байхдаа Өршөөлийн хуулийн дагуу суллагдсан юм байна. Гэвч тэрбээр өнгөрсөн оны арванхоёрдугаар сарын 03-04-нд шилжих шөнө бусдыг хүчирхийлж, эд зүйлийг нь дээрэмджээ. Нийслэлийн Баянзүрх дүүргийн XVIII хороонд байрлах орон сууцны хоёрдугаар давхарт оршин суух айлын тагтаар дамжин орж, хохирогч эмэгтэйд хутга тулган айлгаж сүрдүүлэн хүчирхийлэн, гэрт байсан эд зүйлсийг авч явсан байна. Тэрээр суллагдсанаасаа хойш 20 гаруй хэрэг үйлдсэн гэдгээ хүлээгээд байгаа бөгөөд хэрэг үйлдэх болсон шалтгаанаа “Би энэ нийгэмд идээшиж амьдарч чадахгүйгээс бушуухан буцаад шоронд орохын тулд хэрэг үйлдсэн” гэжээ. Мөн аав ээж ахан дүүс нь байдаг хэдий ч хэн ч хүлээж авахгүй, ойлгохгүй байна хэмээн гомдоллосон аж.
NUUTS.mn
