Д.Хаянхирваа, С.Ганбаатар хоёр 669 мянган төгрөгний хоол “идэлцжээ”
Улстөрчид ууж идэхдээ уургын морь шиг гэдэг үнэн аж. Дархан-Уул аймгийн Аудитын газраас Орхон сумын Засаг даргын нөөц хөрөнгийн зарцуулалтанд шалгалт хийгээд гурван акт тавьжээ. Засаг дарга Б.Батбаяр нь нөөц хөрөнгөнөөсөө Дархан хайрхан уулыг тайх ёслолд 616 мянга, шинийн 8-ны ном уншуулахад 80 мянга, мөн Засаг даргын зөвлөлийн гишүүдэд урамшуулал олгоход 288 мянган төгрөгийг тус тус зарцуулжээ. Гуравдахь зарцуулалт нь орон нутагт ажилласан төрийн албан хаагчдыг хооллож ундалсны 669 мянган төгрөг гэнэ. Засаг дарга дээрхи зарцуулалтанд аудитын акт тавьсаныг эсэгүүцэж төлөхгүй гэж маргажээ. “Манай суманд Хаянхирваа, Ганбаатар нарын УИХ-ын гишүүд ирж ажилласан, эдгээр хүмүүсийг хооллосон зардал байгаа юм” гэсэн гэнэ. Д.Хаяхирваа нь намхан биетэй, С.Ганбаатар нь туранхай зэргээс үзэхэд тийм ч хоолонцор биш баймаар. Гэсэн ч орон нутагт буюу тойрогтоо ажиллахдаа “сайн цохьдог” бололтой. Гэхдээ аудитын шалгалтаар 669 мянган төгрөгний хоолыг тус суманд ажилласан татварынхан, улсын бүртгэлийн ажилтнуудыг дайлж цайлахад гаргасан гэж үзжээ. Аудит байгууллагаасаа томилолтын зардал, хоолны мөнгө авдаг тул тэднийг Засаг даргын нөөц хөрөнгөнөөс мөнгө гаргаж хооллох нь буруу гэж акт тавьсан аж.
