МАН сонгуулийн жилийг зодооноор эхлүүллээ
Шинэ он гарахын хамтаар Ардын намынхан хоорондоо нударга зөрүүлсэн мэдээлэл шил дараалан цацагдлаа. Говь-Алтай аймгийн МАН-ын хорооны гишүүд болох В.Рэнцэндорж, В.Сүррагчаа нар өнгөрсөн сарын 30-ны өдөр Алтай хотын “Залуур Алтай” бааранд архидан согтуурч улмаар танхайран намынхаа нөхдийг зодож хүндээр гэмтээсэн талаар эх сурвалж мэдээлэв. Тэдэнд зодуулсан Д.Шинэбаяр, Алтайбаатар нарын биеийн байдал хүнд байгаа бөгөөд нэг нь эмнэлэгт хэвтэн эмчлүүлж байгаа аж. Тэд тус аймаг дахь МАН-ын хорооны дарга Ж.Ганбатын урилгаар цуглаад байхдаа уг зодооныг хийжээ. Хамгийн ноцтой нь уг хэргийг аймгийн цагдаагийн газраас шалгахгүй өнгөрч байгаа гэх мэдээллийг эх сурвалж өгөв. В.Рэнцэндорж, В.Сүррагчаа нар нь өмнө нь танхайн хэргээр тэнсэн харгалзах ялаар шийтгүүлж байсан бөгөөд Өршөөлийн хуулиар өршөөгдөөд байсан гэнэ. В.Рэнцэндорж нь аймгийн НАМЗХ-ны дарга юм байна. Үүний өмнөхөн Орхон аймгийн МАН-ынхан өнгөрсөн сарын 29-нд баяр тэмдэглэж байгаад зодоон хийжээ. Баян-Өндөр сумын Дэнж багт байрлах Happiness club-д энэхүү үйл явдал болсон бөгөөд тус намын гишүүн н.Алтаншагай Д.Соёлчхүү нар хоорондоо маргалдаж, нэгнийгээ архины шилээр гэмтээсэн байна. Одоогоор цагдаагийнхан уг үйлдэлд эрүүгийн хэрэг үүсгэн шалгаж, мэдүүлэг авч эхэлжээ. Сонгуулийн жил дөнгөж гарч байхад зодолдож байгаа Ардын намынхан нэр дэвшигчийг тодруулах үед бүр ч ширүүн нударгалцах нь нэгэнт тодорхой болжээ.
NUUTS.mn
