Франц хос монгол охиныг өвчтэй хэмээн үрчлэлтээ хүчингүйд тооцуулжээ
Нийтэлсэн: 2016-01-05 03:31:26
Франц улсын иргэн Күрм Кристоф Жак, Хайссински Карин Летесия нар нь өнгөрсөн оны 6-р сард монгол охинг үрчилэн авсан ч өдгөө охиноос татгалзжээ. Учир нь охиныг сэтгэцийн өвчтэй болохыг үрчилэн авсан хойноо мэдсэн гэжээ. Охиныг асран хамгаалагч Б.Батцэцэг нь 2013 онд ЭХЭМҮТөвийн амьсгалын тасагт орхиж явснаар Хүүхдийн төв сувилалын асрамжид ирсэн аж. Энэ хугацаанд эцэг, эх, асран хамгаалагчийг эрэн сурвалжлах ажиллагааг явуулсан боловч тогтоогдоогүй тул үрчлэх хүүхдийн судалгаанд оруулсанаа ХАХНХЯ-д мэдэгджээ. Ингээд өнгөрсөн зун охиныг дээрхи франц гэр бүлд албан ёсоор үрчлүүлжээ. Гэтэл Франц улсын иргэн Күрм Кристоф Жак, Хайссински Карин Летесия нар нь “...хүүхдийг үрчлэн авсны дараа түүний эрүүл мэндийн талаарх ноцтой мэдээллийг олж мэдсэн бөгөөд хүүхдийн эрүүл мэндтэй холбоотой тодорхой хүндрэл учирсан тул өөрсдийн хүсэлтээр үрчлэлийн үйл ажиллагаанаас татгалзаж” үрчлэлтийг хүчингүйд тооцуулах хүсэлтийг шүүхэд гаргажээ. Үрчилж авсаны дараахан УИД-ын дэргэд хамт явж байтал охин гэнэт өмдөндөө шээсэн гэнэ. Өмдийг нь солих гэтэл хүүхэд уйлж монгол иргэд бүчин ирж улмаар цагдаа хүртэл дуудан бөөн шуугиан болжээ. Хүүхдийн эрүүл мэндийн дэвтэрд сэтгэцийн өвчний талаар нь бичсэн атал ХАХНХЯ-ны эрүүл мэндийн дүгнэлтэд “эрүүл, зөрүүд ааштай” гэсэн байсан хэмээн маргажээ. Франц хос тэр даруйдаа охиныг Хүүхдийн төв сувилалын асрамжид буцаан өгч үрчлэлтээ шүүхээр албан ёсоор хүчингүй болгуулж авчээ.
НУУЦ.мн
