Шинэ агентлагийн дарга нар бүтцийн өөрчлөлтөө өөрсдөө шийднэ
Засгийн газрын өчигдрийн ээлжит хуралдаанаас Гааль, татварын ерөнхий газрын даргаар С.Пүрэвийг, Бүртгэл, статистикийн газрын даргаар С.Мэндсайханыг тус тус томилсон байна. “Гангар”-ын хэмээх С.Пүрэв нь Сангийн сайдын зөвлөхөөр ажиллаж байсан бол С.Мэндсайхан нь Үндэсний статистикийн хорооны даргаар ажиллаж байгаад шинэ он гарахын өмнө чөлөөлөгдсөн юм. Энэ нь УИХ-аас баталсан 2016 оны төсвийн хуулийн хүрээнд Үндэсний статистикийн хороог Улсын бүртгэлийн ерөнхий газартай нэгтгэсэнтэй холбоотойгоор хийсэн чөлөөлөлт байв. Түүнчлэн Засгийн газрын хуралдаанаас Бүртгэл статистикийн газрын орлогч даргаар бүтцийн өөрчлөлтөд хамрагдсан Улсын бүртгэлийн ерөнхий газрын дарга Ц.Пүрэвдоржийг томилжээ. Шинээр байгуулагдсан агентлагийн дарга нард бүтцийн асуудлаа хууль тогтоомжинд нийцүүлэн өөрсдөө шийдэх эрхийг өгчээ.
NUUTS.mn
