Нууц мэдээллийн уурхай

Үндэсний эрх чөлөөний баяр, тусгаар тогтнолоо сэргээсний 104 жилийн ойн өдөр УИХ-д суудалтай намын тоо нэгээр нэмэгдэж бие даагч  С.Ганбаатар гишүүн шинээр байгуулагдаад буй ХҮН-д элсэж даргаас нь батлахаа авсан. Тэрээр намд харьяалагдлах болсон шалтгаанаа “бие даагч байхаар ганцаардаад хүчгүйдээд байна, түүнээс гадна МАН, АН-ын аль нэгийг сонговол сонгогчид маань барьж иднэ” гэж тайлбарласан. Гэхдээ шалтгаан нь арай өөр зүйлд байгаа аж.  Боловсролтой, салбар бүрийн шилдгүүдийг эгнээндээ нэгтгэж чадсан гэж PR-аа хийдэг ХҮН-д эхнээсээ эхлээд л улс орны хэмжээнд танигдсан лидер улстөрч байгаагүй. “Хиншүүг” эс тооцвол одоо ч гэсэн алга. Лидер тэргүүлэгч улстөрч болох байх сонирхолтойгоо нуудаггүй С.Ганбаатард өөрөөс нь илүү биш гэхэд дутахааргүй нэр хүндтэй танигдсан хүмүүстэй намыг яагаад ч сонгохгүй. Харин өөрөө дунд нь товойж тодорч харагдах тийм л хүчин хэрэгтэй байсан  нь ХҮН болж таарсан. С.Ганбаатар МАНАН-г шүүмжилдэг ч энэ хоёр намын улстөрчдийн өөрсдийгээ сурталчилах гэсэн бохир аргыг ичиж зоволгүй хэрэглэдэг болсон. Өнгөрсөн жил япон эмч нараар тойрогтоо шоу хийсэнийг нь санацгаая. Гэхдээ С.Ганбаатар нарын “томчууд” орж ирсэн нь нэр дэвших орон зай хайн шинэ намыг бараадсан ХҮН-ын залуусд таалагдахгүй л байх. Гэхдээ өдгөө үүнийгээ ил тод хэлэхгүй байгаа. Хэрвээ С.Ганбаатар МАНАН-г сонгосон бол маргаашнаас нь л  эхлээд хавчигдаад гадуурхагдаад эхлэх байсан.

NUUTS.mn