Жонни Деппын бисекс эхнэрд 10 жилийн хорих ял оногдуулж магадгүй нь
Нийтэлсэн: 2015-12-24 07:29:18
Алдарт жүжигчин Жонни Деппын бисекс эхнэр Эмбер Хердад Австралийн хуулийн дагуу 10 жилийн хорих ял оногдуулж магадгүй болоод байна. Хэдийгээр хэрэгтэн Америкд байгаа ч хоёр улс ялтан шилжүүлэх гэрээтэй тул ямар ч байсан ногоон тивийн шүүхэд очихоос өөр аргагүй болжээ. Хэрэг явдал өнгөрсөн 4-р сард алдарт хос Австралид очихдоо Пистоль, Бу гэдэг хоёр хөөрхөн терьер нохойгоо гааль хилийн шалгалтанд оруулалгүй сэм аваад орчихжээ. Амрах үедээ нохдоо нууцалж зочид буудлаасаа бараг гаргаагүй гэнэ. Гэсэн ч эхнэр нь сэрэмж алдан нохойныхоо үсийг тайруулахаар үсчинд авч очсон агаад алдарт одын нохдын үсийг зассанаа гайхуулах гэсэн үсчин зургийг нь өөрийн цахим хуудсандаа оруулчихжээ. Ингээд бөөн хэрэг дэгдэх нь тэр. Америкчууд гэж хөл алдадгүй ногоон тивийн хууль хяналтынхан хил гааль, хорио цээрийн хууль журам зөрчсөн хэмээн нэг дор өчнөөн хэрэг үүсгэжээ. Хэргийн хариуцагчаар Эмбер татагдсан ч нэг дөрвөн удаагийн шүүх хуралд өмгөөлөгчөө явуулаад өөрөө ирээгүй нь Австралийн шүүхийхний тэвчээрийг баржээ. Удахгүй тавдахь удаагийн шүүх хурал болох агаад энэ хуралд хариуцагч заавал өөрийн биеэр очихоос өөр аргагүй болсон гэнэ. Хэрвээ буруутай нь нотлогдвол 10 жил хорих эсвэл 100 мянан долларын торгууль төлөх хоёр ялын нэгийг оноох аж.
NUUTS.mn
