Улсын заан Ц.Баярсайхан 500 сая төгрөгний хэргээр шүүхэд дуудагджээ
Нийтэлсэн: 2015-12-24 00:40:00
Монгол улсын гавьяат тамирчин, үндэсний бөхийн улсын заан цолтой, ШШГЕГ-ын харьяа “Сүлд” спорт хорооны дарга, ОБЕГ-ын харьяа “Аврагч” спорт хорооны дарга зэрэг өндөр алба хашиж байсан, хурандаа Ц.Баярсайханд холбогдох эрүүгийн хэргийн шүүх хурал өнгөрсөн 21-нд болох байсан ч ирэх жилийн 1-р сарын 4-ний өдөр хүртэл хойшлогджээ. Улсын заан хурандааг “Мах импекс” компанитай гэрээ хийсэн мэтээр хууурамч баримт бичиг ашиглан аж ахуйн нэгж, хувь хүнээс нийтдээ 500 сая төгрөг залилан авсан хэрэгт буруутгаж байгаа гэнэ. Энэ нь мөнгөн дүнгээрээ онц их хэмжээний гэх хохирлын зэрэгт хамаардаг. Түүнээс гадна 50 сая төгрөгний хохиролтой өөр хэрэг ч нэмэгдэн гарч иржээ. Ц.Баярсайхан нь мөрдөн байцаалтын шатанд хохирлоо 100 хувь төлсөн гэж мэдэгдэж байгаа нь ялыг хөнгөрүүлэх нэг үндэслэл болно. Эх сурвалжийн мэдээгээр хэрвээ хохирлоо бүрэн барагдуулсан, хохирогчид өөр ямар нэгэн гомдол саналгүй гэвэл тэнсэн харгалзах ял авах магадлалтай гэнэ.
НУУЦ.мн
