Хандгай агнасан Б.Жумаандоржид 20 сая төгрөгийн төлбөр ногдуулжээ
Нийтэлсэн: 2015-12-15 03:12:02
Хуулиар нэн ховор амьтанд тооцогдох хандгай агнасан хэрэг өнгөрсөн хавар Төв аймгийн Мөнгөнморьт сумын Жаргалант 1-р багийн нутаг Эрдэнэхайрхан уулын өвөр Жаргалантын ам гэх газар үйлдэгдсэн. 20 сая төгрөгний үнэлэмжтэй хандгайг Б.Жумаандорж гэгч нь З.Мягмарсүрэнгийн НО4502138 дугаарын гол төмөртэй, 138 дугаарын замагтай “ТИГР” маркийн буугаар агнажээ. Агнасан хандгай нь молцогт гэдэг нэн ховор зүйлийнх байсан гэнэ. Тухайн үед хандгайн анчнаас гадна Л.Нямсүрэн, З.Мягмарсүрэн, С.Баасанцэрэн нарын хүмүүс “Тоёота ланд прадо” машинаар явжээ. Зүгээр л салхинд гарсан гэж байсан боловч машинд нь ангийн зориулалттай тигр, калибрь буу загасны уурга дэгээ байжээ. Тэд ялалтын баяр тэмдэглэхээр болж 5-р сарын 9-нд Төв аймгийн Мөнгөнморьт сум руу явцгаажээ. Мөнгөнморьт сумаас зүүн хойд зүгт Тэрэлж голын гарамнаас дээш өгсөөд явж байтал бургаснаас бор гөрөөс гарч ирэхэд нь Жумдаандорж мэргэн буудаж унагасан гэнэ. Бор гөрөөсөө машиндаа ачаад Хэрлэн голын эрэг дээр буудаллан эвдэж янзалж элэг цусыг нь идээд Нямсүрэн Баасанцэрэн хоёр загас барихаар гол руу явж нэг ширхэг зэвэг барьжээ. Орой нь нүд харна гээд ганцаараа машинаа унан явсан Жумдаандорж нэлээд сандарч тэвдсэн байдалтай буцаж ирээд машины гэрлийн үзүүрт нүд харагдахаар нь бор гөрөөс байна гэж бодоод буудтал хандгай унагачихаж гэжээ. Тэр дөрөв хоорондоо ярилцаад нэгэнт үхсэн юм бол махнаас авья гээд даах хэмжээгээрээ авцгаажээ. Мэдээж уруул, хэлийг нь бас авчээ. Тэндээ хоноод маргааш нь загасчилж 7 ширхэг зэвэг загасыг Баасанцэрэн нь барьжээ. Ийнхүү Оросын ялалтын баярт монгол хандгайгаар тахил өргөөд буцаж явахдаа Багануурт цагдаад шалгагдаж баригджээ.
NUUTS.mn
