Ли Жон Гёлыг батлан даах Солонгосын ЭСЯ-ын хүсэлтийг зөвшөөрсөнгүй
Нийтэлсэн: 2015-11-26 03:54:24
Зам тээврийн яамны Төрийн нарийн бичгийн дарга асан, “Монголын төмөр зам” ТӨХК-ийн ТУЗ-ийн дарга асан Б.Батзаяаг шинэ төмөр замтай холбоотой хэргээр Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсээс саатуулан шалгаж байгаа. Түүнтэй хамт Ухаахудаг-Гашуун сухайтын чиглэлийн төмөр замын ажлыг гүйцэтгэж байсан Өмнөд Солонгосын “Самсунг С&Т” компанийн захирлыг Ли Жон Гёлыг ч мөн саатуулсан. Тэднийг энэ сарын 18-ны өдөр яллагдагчаар татаж, цагдан хорих хугацааг 2 сараар сунгасан юм. Тэгвэл Ли Жон Гёлын биеийн байдал сайнгүй байгаа талаар ойрын хүмүүс нь ярьж байна. Тэднийг анх баривчлагдахад “Самсунг С&Т” компани болон Солонгосын Элчин сайдын яамнаас Ли Жон Гёлыг батлан даах хүсэлтийг гаргаж байжээ. Гэвч тэднийг цагдан хорьж шалгах үндэслэлтэй хэмээн прокурор эсэргүүцэл бичсэнээр хүсэлтийг хүлээн авалгүй ийнхүү үргэлжлүүлэн хорьж байгаа юм. Тэднийг өнгөрсөн аравдугаар сарын 30-наас хойш саатуулж байгаа бол Б.Батзаяагийн хэрэгт хамт сэжиглэгдээд буй "МТЗ" ТӨХК-ийн дэд захирал асан П.Бат-Эрдэнэ, "Либерти Партнерс”-ын захирал Ч.Ганбат нарыг Олон Улсын Интерполоор хайж байгаа юм. Энэхүү хэргийг ЦЕГ-ын Эдийн засгийн гэмт хэрэгтэй тэмцэх хэлтсийнхэн бүтэн жил орчим хөөцөлдөн байж баримт сэлт цуглуулсны үр дүнд баривчилсан.
