Нууц мэдээллийн уурхай

Жаран боржигон овогт Гэрэлчулууны Ба… гэдэг 17 настай хүү энэ оны 5-р сараас эхлэн 10-аас доош насны хүүхдүүдийн гар утсыг дээрэмдэх “чиглэлээр” дагнан бүр мэргэшиж байгаад цагдаа нарт баригджээ. Тэрээр нийт таван хүүхдийн гар утсыг дээрэмдсэн нь  нийтдээ 860 мянган төгрөгд хүрчээ. 10 нас ч хүрээгүй хүүхдүүддээ 100-350 мянган төгрөгний үнэтэй “Самсунг Галакси S2”, “Самсунг Галакси S3” гэх мэтийн өндөр үнэтэй утас бариулдаг нь хомхой сэтгэлтнүүдэд олз болсоор байна.  Насанд хүрээгүй хохирогч Б.М-г л гэхэд орцонд нь отож байгаад хутга тулган ална шүү хэмээн айлгаж 100 мянган төгрөгний үнэтэй “Самсунг Галакси S2” утсыг нь дээрэмджээ. Мөн 10-хан настай атлаа 340 мянган төгрөгний үнэтэй “Самсунг Галакси S3” гар утас барьдаг Д.Т-г гэдэс рүү цохиод хавсарч унагаад гар утсыг нь дээрэмдсэн байжээ. Гэмт этгээд нэр алдартай сургуулийн эргэн тойронд ажиглалт хийн үнэтэй гар утсаар ярьж байгаа жаахан хүүхдүүдийг онилдог байжээ.  340 мянган төгрөгний үнэтэй утсаа дээрэмдүүлсэн Д.Т нь “.. би нэг сургуульд нэг ангид хамт сурдаг Тэмүүлэн гэх хүүхэдтэй хамт ... тоглож байх үед тоглоомын талбайн хажуу талд цэнхэр өнгийн яак болон цэнхэр өнгийн жинсэн өмд, түрүүгүй цагаан өнгийн пүүз өмссөн бор царайтай уруулынхаа дээд хэсэгт бага хэмжээний сахалтай ах бид хоёрыг хараад байсан ба бид хоёр ч ямар нэгэн зүйл бодолгүй тоглож байгаад... байр руугаа ороод 2 давхарт гартал гадаа тоглоомын талбай дээр бид нарыг хараад сууж байсан ах амандаа хар өнгийн маск зүүчихсэн зогсож байсан ба хажуугаар нь зөрөх үед гэдэс рүү цохиод хавсарч унагаад жижиг эвхдэг хутга гаргаж ирээд утсаа гаргаад ир гэхээр нь би айсандаа өөрийнхөө Самсунг Галакси S3 маркийн гар утсаа өгсөн ” гэжээ.

NUUTS.mn