АН-ын дарга нар “хүрээ нь жижиг ажил нь жижиг” намын ажлаа хаяж байна
АН-ын орон нутгийн дарга нар нь намын явуулж байгаа бодлого авч хэрэгжүүлж байгаа арга хэмжээнд гутарч залхаж сүүлдээ өөрсдөө ажлаа өгөн гарцгаах болжээ. Тэд Ардын намыхан шиг нэлээд хөлс хүч гарган байж аймаг сумын намын дарга дэд дарга болдог. Гэтэл арай гэж хүрсэн албан тушаалаасаа өөрсдөө сайн дураараа татгалзах болсон нь гайхалтай. АН-ын дарга нарт сонгуульт жилийн хугацаанд намаасаа, намынхаа Засгийн газраасаа явуулсан бодлого авсан арга хэмжээг цэгцлээд хэлье гэхэд хэлэх зүйл олдохоо больжээ. Үүн шиг бэрх зүйл ард иргэдтэйгээ өдөр бүр нүүр тулдаг орон нутгийн намын ажилтнуудад байхгүй гэдгийг хотод суудаг, хааяа нэг зурагт хэвлэлээр гардаг Л.Эрхэмбаяр мэдэхгүй. Намын генсек нь АН-ын мөрийн хөтөлбөрийн хэрэгжилтийг хувьчилж гаргах боломжгүй гэж хээв нэг хэлж байхад арга ч үгүй биз. Түүнээс гадна УИХ, Засгийн газарт өдөр булайгаа дэлгэж байгаа нөхдүүдийн өмнөөс бас нүүрээ улайлгаж нүд рүүгээ чичлүүлэх хэрэг гарна. Архангай аймгийн Эрдэнэнбулган сумын АН-ын дэд даргын ажлаа өгсөн шалтгаан нь генсек Л.Эрхэмбаярын ажлыг дүгнэсэн дүгнэлт гэхэд болно. Засгийн эрх баригч намын ажил улсын хэмжээнд жижгэрсэн нь хөдөө суманд бүр ч өчүүхэн болж харагдах нь мэдээж. Дээд дарга нарынхаа бүтэлгүйдлийн төлөө доод шатныхан чичлүүлж хамаг бурууг нь үүрэх нь жинхэнэ зовлон биз. Намын ажил нь доод шатандаа ингэж дампуурсан байхад генсек нь төв аппаратаа ч цэгцэлж чадаагүй сууна. Харин ч бүр бужигнуулсан гэхэд болно. Л.Эрхэмбаяр ажлаа авангуутаа Хяналтын ерөнхий хороогоороо оролдон хуульчийг нь халсан. Чухам ямар шалтгаанаар халсанаа хэлдэггүй, бүрэн эрхийнхээ хүрээнд л халсан гээд суугаад байна.
НУУЦ.мн
