“Эрдэнэт” үйлдвэр нь ямар ч хэрэггүй оюу чулууг хулгайлсан хэмээн ажилчдаа тагнуулаар шалгуулжээ
Нийтэлсэн: 2015-10-12 02:13:25
Манай саалийн үнээ болсон “Эрдэнэт” нь удахгүй хаалтын менежмэнтэндээ орох гэж байна. Өдгөө ашиглаж болох бүхнээ ашиглах нь мэдээж ч ямар хэрэггүй, өөрсдийнх үйлдвэрлэлд тохирдоггүй, гаргаад зарсан ч үнэ хүрдэггүй оюу чулуу гэгчээ их харамлаж хажигладаг хэвээрээ гэнэ. Өмнө нь үйлдвэрлэлийн талбайгаас оюу чулуу буюу малахитыг хулгайлсан хэмээн халдаг байсан бол өдгөө бүр тагнуулаар шалгуулж зовоодог болжээ. Энэ хавар л гэхэд Хүдрийн ил уурхайн Уурханй зам овоолгын хэсэгт ажилладаг Ч.Э, Б.Б, Н.Э нарыг үйлдвэрлэлийн талбайгаас оюу чулууны агууламж бүхий үнэт чулуу хулгайлсан хэмээн ажлаас нь халаад тагнуулд өгчихжээ. Орхоны тагнуулын нөгөө хэдийг хэсэгтээ шалгасан гэнэ. Гэтэл хулгай хийсэн гэх ажилчид нь белазаар ачиж авчиран асгасан хаягдал гэх шорооноос авчээ. Ногоон саарал өнгөтэй тиймэрхүү чулуугаар хөөрөгний толгой мөн шатар ч хийдэг аж. Үйлдвэрийн захиргаа ажилчдаа үнэт чулуу хулгайлсан гэсэн атал “Эрдэнэт”-ийн судалгааны төв нь ажилчдын авч гарсан гээд байгаа чулууг “…эрдэнийн чулуунд хамаарах цэвэр оюу биш харин исэлдэж шаварлаг болсон чулуу” гэж тодорхойлжээ. Тэгээд ч малахит буюу оюуны агууламжтай чулуу нь үйлдвэрийн технологийн процессд тохирдоггүй, баяжигдадгүй, баяжуулалтанд орсон ч ямар нэгэн үр дүн гардаггүй бодис гэдгийг технологийнхон нь баталдаг гэнэ. Ийнхүү хуулийн байгуулагынхан эрүүгийн хэрэг үүсгэхээс татгалзчихаад байхад үйлдвэрийн захиргаа нь ажлаас халсан шийдвэрээ цуцлаагүй л байна.
NUUTS.mn
