Нууц мэдээллийн уурхай

Урд хөршийн Ерөнхий сайд Ли Кацянь саяхан олон жил нуун дарагдуулж ирсэн урхагшсан гурван асуудлаа дэлгэсэн нь нууц банкны сүлжээ, газрыг зориуд ашиглахгүй дарах, ажилгүйдлийн түвшний тухай хуурамч мэдээлэл гэж нэрлэжээ. Хонконгийн “Дунсянь” сэтгүүл өнгөрсөн сарын 2-нд болсон Хятадын Төрийн зөвлөлийн гуравдахь удаагийн хуралдаанд Ерөнхий сайд нууц банкны сүлжээг ноцтой асуудал болсоныг зарласан гэжээ. Хуралдаанд Хятадын төв банк, төрийн мэдлийн дөрвөн том банк болон СЯ, Банкны салбарыг зохицуулах улсын комиссын удирдлагууд оролцсон. Ерөнхий сайд 1999 оноос хойш яригдаж ирсэн нууц банкны сүлжээ одоо бүр ил гараад 16 жилийн турш хуулиас гадуур оршин тогнож ирсэний учрыг цугласан сайд дарга нараас асуужээ. Одоогийн байдлаар Хятадын 120 хотод 3350 нууц банк ажилладаг гэнэ. Юань болон валютыг нууцаар гадагшаа гаргах үйл ажиллагаа эрхэлдэг энэ сүлжээнд 120-140 мянган хүн хамаардаг аж. 200-2004 онд нууц банкнуудын сувгаар Хятадаас 450-800 тэрбум юань гарсан нь бараг 70-125 тэрбум доллар болжээ. Тэгвэл 2012 онд энэ тоо өсөж 3 их наяд юань буюу 475 тэрбум доллард хүрчээ. “Дунсянь” сэтгүүлийн баримтаар энэ зуны 6-р сарын 24-ноос 8-р сарын 14-ны хооронд л гэхэд нууц банкаар дамжин 620 гаруй тэрбум юань гадагшаа гарчээ. НАХЯ нь 8-р сарын 30-нд “нууц банкны сүлжээнд өгсөн цохилт”-ынхоо талаар хоёр сарын ажиллагаагаар 37 нууц банкыг илрүүлж 75 хүнийг баривчлан 240 тэрбум юаны гүйлгээг таслан зогсоосон гэж тайлагнасан. Ерөнхий сайд нууц банкны сүлжээ амь бөхтэй оршиж бүр цэцэглэсээр байгааг бүгд мэддэг ч таслан зогсоох талаар хэн ч юу ч хийхгүй байна гэж уурссан гэнэ. Нууц  банкыг устгаж чадахгүй байгаа нь төрийн албан хаагчид авлигалд идэгдэж улс орны санхүүгийн салбар унан доройтож байгаагийн илрэл хэмээн тэрээр хуралдаан дээр мэдэгджээ.

NUUTS.mn