ТӨХ “Биокомбинат”-ын экс захирал Б.Баттогтохоос 169 сая төгрөгөө нэхэмжилэхээр “эрэн сурвалжилж” байгаа гэнэ
Нийтэлсэн: 2015-09-14 14:39:57
МАН засаг барьж байх үеийн 2010-2012 он нь төрийн өмчит “Биокомбинат”-ын хувьд хар дарсан зүүд шиг цаг үе байжээ. Тухайн үед ажилчид болон комбинатын захирал Б.Баттогтох, ХХААХҮ-ын сайд Т.Бадамжунай нарын хооронд жинхэнэ дайн өрнөж байсан. “Цагаан залаа” компаний захирал Б.Баттогтох 2010 онд захирлаар ирсэн бол дараа жил нь ажилчин ажилтнууд нь эсэргүүцэн унагсан. Гэсэн ч гандан бууршгүй захирал хатагтай ахин ТӨХ-ийн тогтоол гаргуулаад удирдлагыг авахаар зүтгэсэн. Тэр удаад бүр яамны дэмжлэгийг хүртэл авсан байсан гэдэг. ТӨХ нь сайд Т.Бадамжунайгийн дэмжсэн албан тоотыг үндэслэн 2011 оны зун Б.Баттогтохыг ахин захирлаар томилсон. Ажлаа авсан захирал халаа сэлгээг өргөн фронтоор хийсэн агаад үр дагавар нь “Биокомбинат”-ын санхүүд шууд туссан. Б.Баттогтохын хууль бусаар халсан хүмүүс бүгд шүүхээр заргалдаж ажил албан тушаалдаа эргүүлэн тогтоогдсон. Тэдэнд хуулийн дагуу олгосон ажилгүй үеийн нөхөн олговор нь нийт 169 сая төгрөг хүрчээ. Өдгөө ТӨХ энэ мөнгөө олж авахаар экс захирал Б.Баттогтохыг саяхан шүүхэд өгч. Гэтэл заасан гэрийн хаягд нь экс захирал амьдардаггүй болох нь Баянгол дүүргийн 14-р хорооны Засаг даргын тодорхойлолтоор нотлогджээ. Ийнхүү ТӨХ төрийн өмчит “Биокомбинат”-ын экс захирал Б.Баттогтохыг эрэн сурвалжилж байгаа гэнэ.
