Хаанбанкны Зээлийн хорооны захирал асан н.Энхбаатард эрүүгийн хэрэг үүсгэжээ
Нийтэлсэн: 2015-09-08 23:45:59
“Хаанаасаа хаалгач нь” гэдэг үг энэ нийтлэлд гарах баримтанд яг тохирох байх. Хаанбанкнаас зээл авахын тулд захирал эрхлэгчийн хамаатан, зээлийн эдийн засагчынх нь төрсөн дүү болж төрөх хэрэгтэй бололтой. Хэрэв тэгвэл дутуу баримт бичигтэй, зээлийн барьцааны хөрөнгө нь давхар барьцаалагдсан байсан ч хамаагүй гэнэ. Хаанбанкны “МУИС” тооцооны төвд хийсэн шалгалтаар “Флора центэр” төвийнхөн бас л дутуу баримт бичгээр 500 саяын зээл авсан нь тогтоогдсон. Тэгвэл тус салбарынхан зөвхөн гадны хүнд л зээл өгөөд байдаг “элэг муутай” хүмүүс бас биш гэнэ. Мэдээж ах дүү хамаатан садандаа өгч байсан. Банкны дотоод аудитын тайлангаар зориулалт бусаар ашиглагдсан 31 зээл илэрчээ. Үүнээс нэлээд олон тооных нь банкны ажилтнуудын хамаатан садан авсан болох нь тогтоогдож. 2015 оны банкны шилдэг ажилтнаар шалгарч байсан Б.Э нь гэхэд төрсөн дүү Энхбаярдаа 68 сая төгрөгийн 8 хувийн хүүтэй урт хугацааны зээл олгоход оролцсон байж. Дүү нь Төрийн банкинд ажилладаг атлаа Хаанбанкинд “Гүн нуур гэрэлт” компанид ажилладаг гэсэн тодохойлолт гаргаж өгчээ. Төрийн банкны ажилтанд зээл олгосон эдийн засагч Г.М нь түүнийг Б.Э-гийн дүү гэдгийг нь мэдэж байсан гэдгээ ч хүлээж. Захын зээлийн эдийн засагч ийнхүү давуу байдлаа гэр бүлийнхээ төлөө ашиглаж байхад Зээлийн хорооны захирал Э нь нэлээд эрх мэдэлтэй “жаалжээ”. ӨдгөөЗээлийн хорооны экс захиралд эрүүгийн хэрэг үүсгэн шалгаж байгаа гэнэ. Э захиралын хадам ах Б.Бямбадорж нь “МУИС” тооцооны төвөөс 8 хувийн хүүтэй 100 сая төгрөгний орон сууцны зээл авсан байж. Хадам ахын худалдан авсан гээд байгаа байр нь тухайн үед өөр компаний 300 саяын барьцаанд тавигдсан байхад хүртэл давхар барьцаалан зээлийг олгожээ. Банкныхан байр давхар барьцаалагдсаныг “мэдээгүй” болж таарчээ. Мөн эхлээд 100 сая төгрөгөө өгчихөөд долоо хоногийн дараа барьцааны гэрээгээ нөхөж хийсэн байж. Зээл авагч нь Зээлийн хорооны даргатай хамаатан садны холбоотой байхад тэр тухайд зээл хүсэгчийн анкетенд бичихээ мөн л “мартаж”. Манай хамгийн том банкны нэгэнд та бидний мөнгийг хадгалж хариуцаж байгаа ажилтнуудынх нь сэтгэл, ухамсар, ажлын хариуцлага зэрэг нь ийм л байна даа…
