С.Отгонбаатар “Монгол шилтгээн”-ээ “Голомт” банкны 2,3 тэрбумын өрөнд алдахдаа тулжээ
Нийтэлсэн: 2015-09-08 01:05:26
Сүүлийн хэдэн жил бизнесээс улстөр лүү шуурхай орсон “Монгол шилтгээн”-ий босс С.Отгонбаатар нэрийг нь тахалдаг том обьектоо “Голомт” банкинд алдахад хүрээд байна. 2009 онд Баянзүрх дүүргийн шүүхээс “Монгол шилтгээн”-ээс 2,3 тэрбум төгрөг гаргаж “Голомт” банкинд өгөх шийдвэр гаргасан. Энэ шийдвэрийг Нийслэлийн шийдвэр гүйцэтгэлийнхэн биелүүлэх гэж жил гаруй С.Отгонбаатарын цэргүүдтэй зөрчилдөж байна. Шийдвэр гүйцэтгэлийнхэн обьектыг нь бүхэлд нь хааж битүүмжлээд “Мөнх оргил трейд” компаниар үнэлүүлжээ. Эхний үнэлгээ нь 7,1 тэрбум гэж гарсаны дагуу тэр үнээр нь албандан дуудлага худалдаа зарласан ч авах хүн гарсангүй. Энэ үнийг нь “Монгол шилтгээн”-ийнхэн ч эсэргүүцэж зах зээлийн үнээс хэт доогуур үнэллээ хэмээн хэл ам гаргаж. Нэгэнт худалдан авах хүн компани гараагүй тул Нийслэлийн шийдвэр гүйцэтгэлийнхэн барьцаа хөрөнгийг нь тэр чигээр нь “Голомт”-д өгөхөөр шийдээд байна. Энэ үеэр “Монгол шилтгээн”-ий жижиг хувьцаа эзэмшигчид гараад иржээ. Тус компани нь олон нийтэд нээлттэй агаад 260 хувьцаа эзэмшигчидтэй компани аж. Голлох хувьцааг компанийг үүсгэн байгуулагч С.Отгонбаатар эзэмшдэг гэнэ. Түүнтэй шийдвэр гүйцэтгэлийнхэн уулзаж албадан дуудлага худалдаа явуулах, дараа нь “Монгол шилтгээн”-ий зочид буудал зоогийн газрын цогцолборыг нь тэр чигээр нь “Голомт” банкинд шилжүүлэх тухайд мэдэгдэж. Өдгөө шилтгээнээ алдахгүй байх гол арга нь бусад хувьцаа эзэмшигчдээ босгох явдал болжээ. Цаадуул нь шинжээчид бидэнтэй уулзаагүй, зах зээлийн үнээс хэт доогуур үнэлсэн, хувьцаа эзэмшигчдийн хурал зарлаж болж байгаа үйл явдлыг хэлэлцэн шийдвэрлэх боломж олгоогүй хэмээн шийдвэр гүйцэтгэлийнхэнтэй заргалдаж явна. Гэсэн ч Нийслэлийн шийдвэр гүйцэтгэлийнхэн энэ ажиллагааг хурдан дуусгах гэж ихэд хүчилж яарч байгаа аж.
