“Монь-Ивээл”-ийн дэд захирал м2-ын асуудлаар хандсан иргэнтэй зүй бусаар харьцжээ
Нийтэлсэн: 2015-09-03 14:36:41
Бизнесд эелдэг боловсон харилцаа гэдэг ямар чухал зүйл болохыг монголчууд одоо болтол ухаараагүй л байна. Тайван хүлээцтэй хандаж харилцан ярилцаад тохирчих асуудлыг бүдүүлэг харьцааныхаа улмаас хуулийн том асуудал болгон хувиргах нь олонтоо гардаг. Хэрвээ “Монь-Ивээл” компаний дэд захирал байрны м2-ын асуудлаар орсон иргэнтэй зүй бус харьцаж явдаг газраараа яв хэмээн хөөж туугаагүй бол энэ хэрэг дэгдэхгүй ч байсан байж магадгүй. Компаний удирдлагын бүдүүлэг харьцаанд уурссан иргэн шууд л ШӨХТГ-д хандсанаар акт тавигдаж гэрээнд заагдсанаас бага талбайтай байр хүлээлгэн өгсөний төлөө 2 сая төгрөг төлөх болоод байна. Хохирогч иргэн нь “Монь-Ивээл” компаний барьсан “Ивээл” хотхоны 41А байранд 46.54м2 талбайтай 2 өрөө байр захиалж. Байрандаа орсоны дараа хэмжилт хийдэг компаниар хэмжилт хийлгэхэд 45.22 м2 буюу гэрээнд заагдсан талбайнаас илт дутуу гарчээ. Үүний зөрүү нь 2 сая төгрөг болсон гэнэ. Энэ талаар компаний дэд захиралтай уулзтал зүй бусаар харьцаж явдаг газраараа яв, яаж ч чадахгүй хэмээн илт үл тоосон байдал гаргасанд тэр дороо ШӨХТГ-д ханджээ. Тус газрын байцаагчын шалгалтаар “Монь-Ивээл” нь захиалагчдаа м2 дутуу байр өгсөн нь тогтоогдож акт тавигджээ. Энэ хэргийг дуулсан “Ивээл” хотхоны захиалагчид байрандаа хэмжилт хийлгэж эхэлсэн гэнэ.
