Б.Алтанцаг А.Шоовдороос авсан 20 саяынхаа 5 саяыг нь л гаальчдад “зээлүүлжээ”
Нийтэлсэн: 2015-08-28 03:37:43
Хөтөлийн цемент шохойн үйлдвэрийн захирал А.Шоовдорын хэрэгт холбогдогсод бүгд цагаадлаа. Захирлаас гадна хахуулийн гэх 20 саяыг өгүүлсэн ерөнхий нягтлан Д.Наранчимэг, хахууль өгсөн гэх хангамжийн менежер Б.Алтанцаг, 5 саяын хахууль авсан гэгдэх Дарханы гаалийн ахлагч байцаагч А.Наранхүү, байцаагч Б.Даваадорж, Д.Одонтуяа нарт холбогдох эрүүгийн хэргийг хэрэгсэхгүй болгожээ. Ийнхүү энэ хэргийг мөрдсөн байцаагч ажилласан прокурор нарын ажил АТГ-ынх шиг үр дүнгүй болон хоцорч. Ган хавтангаа авахад зориуж 20 сая төгрөг гаргасан ч яг байцаагч нарын гар дээр 5 сая ирсэн байдаг нь гайхалтай. Зам зуураа 15 сая төгрөг нь алга болж. Дунд нь ажилласан Б.Алтанцаг нь ган хавтангаа авах тал дээр боломж байна уу гэхэд гаалийн байцаагч Б.Даваадорж 20 сая байвал болно гэжээ. Үүнийг удирдлагадаа дамжуулахад тэр дор нь л зарцуул гээд хэлсэн мөнгийг нь гаргаад өгч. Тэртэй тэргүй ган хавтан нь үйлдвэрийн хашаанд хэвтэж байсан тул шууд аваад угсарч гарч. Энэ зуур гаалийн байцаагч нарт мөнгө нь ирсэнгүй. Б.Даваадорж Наранхүү, Одонтуяа хоёртоо “Хөтөлийнхэн баярлуулна гэсэн” гээд ам алдчихсан тул баларчээ. Одонтуяа нь нөгөө мөнгөө яасан хэмээн хэдэнтээ нэхэж. Ингэж удтал явсаны дараа Б.Даваадорж нь баярлуулах учиртай Б.Алтанцагтайгаа таарч мөнгөө нэхжээ. Орой нь гаалийн байцаагчийн хамаатан Баярсайханы дансанд 5 сая төгрөг шилжин орж ирсэн гэнэ. Байцаагч тэр мөнгөнөөс 1 сая 350 мянган төгрөгийг нь нөгөө ажлын мөнгө хэмээн ахлахдаа оруулж өгч. Одонтуяад мөн тэр хэмжээний мөнгийг Хөтөлийнхөн баярлалаа гэж байна гээд өгчээ. Өөрөө 2,3 саяыг нь авчээ. Гаалийн татвард 100 сая төгрөг төлж байж авах ган хавтанийг нь 20 саяар зохицуулж өгсөн тул А.Шоовдор Наранчимэг нар хэнд хэдийг өгсөн хэмээн асуугаагүй аж. Үйлдвэрийн хашаанд байсан хавтанг шууд л өгүүлсэн тул Б.Алтанцаг 20 сая төгрөгөө дансандаа хадгалж өөр зүйлд зарцуулж байжээ. Энэ зуур Англид эмчилгээнд яваад ирсэн гэнэ. Ирсэн хойноо гаалийн байцаагчтай таарч тэрээр мөнгөө нэхсэнд байгаа нь энэ гээд 5 саяыг л өгчээ. Дараа нь бүгд зээлүүлсэн болж хувирсан. Гаалийн байцаагч нь эмчилгээнд явах гээд Б.Алтанцагаас 5 саяыг зээлсэн бол ахлах байцаагч Наранхүү нь компьютер авах гээд Б.Даваадоржоос 1,3 саяыг бас л зээлсэн гэж мэдүүлжээ. Харин Б.Алтанцаг нь мөрдөн байцаалтанд “мөнгө орж ирэнгүүт Даваадоржид мөнгөө авах уу гэсэнд түр хүлээ гэсэн, энэ зуур би Англи яваад ирсэн, дараа нь Хөтөлд Даваадоржтой тааралдахад нөгөө мөнгөө гэж нэхсэн, хамаатных нь данс руу 5 саяыг шилжүүлсэн, би захиралд 20 саяыг хээл хахуульд нэхэж байна гэдгээр ойлгуулсан, тэр утгаар Наранчимэгд хэлж шилжүүлгээр гаргаж өгсөн, гэхдээ би бусдад хээл хахууль өгөх асуудлыг мэддэг хүн биш, удирдлага л зөвшөөрөөд 1,2-р гарын үсэг зураад 20 саяыг өгсөн шүү дээ” гэж мэдүүлжээ.
NUUTS.mn
