260 сая төгрөгөөр Астанагийн дэвжээг “арчиж” байна даа
Нийтэлсэн: 2015-08-25 10:11:06
Засаг барьсан намуудын дампуурал, Өршөөлийн хууль, цэцэрлэгийн дараалал зэрэгт давхар давхар уурлаж бухимдсан монголчуудыг ганц тайтгаруулах зүйл нь жүдогийн ДАШТ байлаа. Даанч мундэг гэж өөрсдийгөө дөвийлгөчихсөн, мундаг гэдэгт нь бид ч итгэчихсэн жүдочид маань ээлж дараалан шидүүлсээр байна. Монголын хэн хэн гэдэг аваргууд Мөөеэ аваргын хэлдэгээр хэрхэн “өнхрөөд” өгсөнийг бүгд харсан. Спортод ялах ялагдах нь байдаг л зүйл. Гэсэн ч сүүлийн үед голдуу ялагдаж байгаа харьж байгаа бөхчүүд Астанаг зорьсон нь гайхалтай. Гадны залуу бөхчүүдэд цэвэр шидүүлж байгаа ахмад аваргуудаа хараад яагаад оронд нь нөгөө хэнийг явуулаагүй юм бол гэж гайхаж шогшрох хүн олон. Миярагчаа, Хэрлэн, Амартүвшин нар үлдэж. Манай жүдочдын нэгэн үе үүгээр дуусаж байгааг казахын дэвжээ харууллаа. Тэд дэлхийд аваргалж байсан ч Монголд жиндээ бас “азаргалж” байсан нь үнэн. Нэг жинд нэг сайн бөхөд бүхнийг даатгах шүтэх, нөгөө бөх нь доороос гарч ирдэг хэдээ “дардаг” зангаасаа салах болж. Үүнийг нь мэдсэн бол 260 сая төгрөгөөр нь хэдэн ирээдүйтэй залууг авч очоод дэлхий дэвжээ ямар байдгийг мэдрүүлсэн бол дээр байж. Цагтаа мандаж явсан аваргууд маань халаагаа өгөх цаг иржээ.
