20 мянган га хагалуулсан Дорнодын Засаг даргад хариуцлага тооц гэжээ
Халх голын чөлөөт бүсийн маргаан улам ширүүсэж байна. Хөдөө аж ахуйн чөлөөт бүс гэнэтхэн л байгуулагдсан, Монголын хамгийн үр шимт газрыг тэр чигт нь хамруулсан нь улстөрийн бизнесийн бүлэглэлийн оролцоо сонирхолоор хийгдсэн гэдэгт олон нийт улам бүр итгэж байна. Манай улсын нефтийн салбар 10-аадхан гэр бүлийн гарт аль хэдийн орчихсон. Уул уурхайг мөн л 40-өөд гэр бүлийн тоонд эргэлддэг 2-3 том бүлэглэл авчихсан. Тэгвэл ирээдүйд ямар идэх талх боов идэх нь Халх голын чөлөөт бүсэд эзэн суусан хэдхэн компанийн эздийн тааллаас хамарах нь. Чөлөөт бүсийн сургаар Халх гол руу дотоодоос Монголын гадаадаас Хятадын баячууд шавж эхэлсэн. Дотоодынхон хэдэн арван мянган га-гаар нь газар тариалангийн талбай авч байгаа бол хятадууд уламжлалт аргаараа монгол эхнэрүүдийнхээ нэрээр орж ирж байна. Саяхан л гэхэд Халх голд монгол эхнэртэй хятад бизнесмэн хоёр гурван зуугаар нь үнээ худалдан авч том ферм байгуулж эхэлсэн тухай нутгийнхан ам дамжуулан ярьж эхэлсэн. Одоохондоо арван хорин “хүргэн” орж ирж байгаа бол хэдхэн жилийн арав хорин мянган ажилчин орж ирэхгүй гэсэн баталгаа алга алга. Р.Бурмаа сайд зөвхөн өндөр технологитой гадаадын компанийг оруулна гэсэн. Өнөөдүүл нь ийм сүүлийн үеийн техник технологийг монголчууд мэдэхгүй ажиллуулж чадахгүй гээд гадаадаас ажилчиддаа оруулна гэдгийг мэдэж байсан ч дуугараагүй. Өдгөө бүхэл бүтэн Мэнэнгийн талыг багтаасан чөлөөт бүсэд хэн түрүүлж авсаных нь аз гэсэн уралдаан явагдаж байна. Ямар ч тушаал заавар өгөөгүй байхад аймгийн Засаг дарга нь 20 мянган га газар аль хэдийн хагалуулчихжээ. МАН-аас сонгогдсон Су.Батболд том толгойтой даргатай хариуцлага тооцохыг чуулганы хуралдаан дээр шаардсан. Өдгөө Дорнодод орон нутгийн удирдлагатай нь ойр дотно нь хожиж байна. Аймгийн засаг дарга М.Бадамсүрэн, Халх голын сумын засаг дарга В.Мөнхсайхан, сумын ИТХ-ын төлөөлөгчид гээд “үнэд” хүрч байгаа нөхөд олон. Халх голын Засаг дарга уг нь ИЗНН талдаа байсан гэнэ. Гэтэл М.Бадамсүрэн нь түүнийг Ардын нам руугаа амжилттай “татаж” байгаа сурагтай.
