Тэнгэр хуйсгануулсан Өршөөлийн хуулийг Ерөнхийлөгч “өршөөхгүй” гэв
Өчирдөрхөн нарлаг сайхан байсан тэнгэр хангай өнөөдөр хуйсганан салхи шороо дэгдсэн. Бөө үзмэрч нар үүнийг олон түмнийг хилэгнүүлсэн Өршөөлийн хуулиас болсон гэж айлдаж байна. Төр түмний төлөө зүтгэнэ гэж өндөр албан тушаалд очсон ч эрээлж зоволгүй идэж уугаад ял шийтгэлээ авсан этгээдүүд энэ хуулиар шоронгоос суллагдах болжээ. Олон нийт зохих хариуцлагыг нь хүлээлгэх ёстой хэмээн шаардаж буй цагаан захтнууд ч гэсэн мөрдөн байцаалтаас хэрэг нь хэрэгсэхгүй болох нь. УИХ-ын хаалттай хуралдаанаас хэлэлцэж баталсан энэ хуулийг сөрөг хүчин шиг сөрөг хүчин байна гэж амлаад байсан МАН чимээгүй суух маягаар дэмжсэн. Нэгэнт батлагдсан хуулийг зогсоох ганц эрх Ерөнхийлөгчид байсан агаад тэрээр хориг тавихаар болжээ. Энэ нь улс орны улстөр, эдийн засгийг унгаж байгаа АН-ын булхайнд хутгалддаг хэмээн шүүмжлүүлдэг Ерөнхийлөгчтөнд нэр хүндээ аврах нэг гарц биз. Хэрвээ Ц.Элбэгдорж Өршөөлийн хуульд хориг тавилгүй “өршөөсөн” бол ард түмэн түүнийг өршөөхгүй байсан. Өмнө нь 34 тэрбумын хэрэгтэй америк эрийг өршөөж байсан тэрээр өдгөө улсын төсөвд 35 тэрбумын хохирол учруулсан цагаан захтнуудыг хаацайлахгүй л гэж найдая. Өршөөлийн хуульд тавих хориг нь ээлжит шоу нь биш байгаасай.
