“50 саяын” М.Зоригтод түймэрт нэрвэгдсэн тойргийнхон нь таагүй хандаж байна
Жороо луус унасан хүрээний аальгүй хүүхнүүдийг уралдуулан шалгаруулж түрүүлсэнд нь 50 сая төгрөгөөр “гар цайлгах” тухай М.Зоригт гишүүний шалиг амлалт олон нийтийг шуугиуллаа. Энэ мэдээ ялангуяа хаврын их түймрээс хойш тэнхэрч чадаагүй Сүх жанжны нутгийн хэдэн малчинд таатай сонсогдсонгүй. Тэр аймшигт түймэр өнгөрсөн ч яаж зовж шаналж хохирсон нь одоо болтол мэдрэгдсээр тэмтрэгдсээр л байна. Мал хөрөнгөө алдсан малчдаас гадна түймэрт дайчлагдсан хүмүүс нь идэх хоолгүй тулаад арга ядахдаа сумын дэлгүүрээс бэлэн хоол зээлж авч байсан гэдэг. Одоо ч туслалцаа дэмжлэг хэрэгтэй хүмүүс байсаар л байна. Засаг дарга Ж.Батсуурь нь мөн адил “нүгэлтэй” баян эрхэм гэдэг нь ХОМ-оос нь харагддаг. Ер нь гишүүн, засаг дарга хоёр нутагтаа эзэн суусан гэнэ. Энэ жил л гэхэд Сүхбаатарын долоон сум ойгоо тэмдэглэснийг М.Зоригт, Ж.Батсуурь хоёр хуваан авч найрын ширээний голыг эзэгнэнхэн суужээ. ИТХ-ын дарга тэргүүлэгч нар нь ганц нэг сумд очьё гэсэн гэсэн боловч тас загнуулсан сурагтай. Түймрийн хохирлоос тэнхэрч чадаагүй нутгийнхандаа туслахын оронд будмал хүүхэн, дөрвөн хөлтэй адгуус хоёрт мөнгө амлан баярхаж суудаг гишүүн сонгуулийн өмнө том оноо алджээ. Ер нь манай баячууд “бандаашны” сэтгэхүйгээсээ гараагүй байна. Бөх, хүүхэн хоёрыг л шагналаа гэж сонсогдохоос математикийн олимпиадад түрүүлсэн хүүхдийг урамшуулж мэддэггүй. М.Зоригтын орон зай болоод байгаа твитерд л гэхэд УИХ-ын 20 гаруй гишүүн байнга “жиргэдэг”. Гэтэл нярайн тасагт хандив өгөх хөдөлгөөн цахим орчинд жил гаруй явагдаж байхад нэг нь ч гар сунгаагүй л байна.
