МҮБХ огт гаргаагүй тогтоолоор бөхчүүдийн эрэмбэд халдаж байсан нь тогтоогджээ
Нийтэлсэн: 2015-07-22 04:23:17
Энэ жилийн наадам МҮБХ үндэсний бөхийг удирдах ямар ч чадваргүй болсоныг тодоос тод харуулсан. Хоёрхон бөхийн хэн нь ердөө тавхан минут зүүний магнайд зогсох эсэхийг шийдэж чадалгүй сүүлдээ төр засгийг татан оролцуулж эцэст нь наадамчин олныг хагаралдуулсан. Тэгвэл түүнээс дутахгүй ноцтой хэрэг нуугдаж байсан нь аймгийн хурц арслан Г.Баяржавхлангийн заргаар илэрчээ. Аймгийн хурц арслан нь МҮБХ-ны удирдлагатай өнгөрсөн жилийн намраас хойш энэ цолоороо барилдах, эрэмбэлэх эрхээ хамгаалж шүүхдэлцсэн. Г.Баяржавхлан нь Дундговь аймаг байгуулагдсаны 71, Их мандал-2012 говийн бүсийн даншиг наадамд түрүүлж аймгийн хурц арслан цол хүртсэн. Гэтэл Р.Нямдорж тэргүүтэй МҮБХ нь Үндэсний баяр наадамын тухай хуулийг уг даншигаар зөрчсөн хэмээн асуудал үүсгэжээ. Үүнд 256-аас илүү тооны бөх барилдуулсан, тухайн үед а.н цолтой байсан Г.Баяржавхлан нь дөрвийн даваанд у.н Б.Адъяахүүтэй барилдах байсныг будлиантуулж өөрийн аймгийн харьяат у.н Г.Олзгэрэлтэй тааруулсан гэнэ. Улмаар тавын даваанд 32 бөх гарах байсныг 34 болгож Г.Баяржавхлан нь у.н Ш.Жаргалсайханг давж, 7-гийн даваанд у.н Ч.Баянмөнхийг, 8-ын даваанд у.з Өсөхбаярыг тус тус хаяжээ. Ингээд үзүүр түрүүнд у.х Л.Пүрэвжавд тэврүүлж үнэсүүлээд барилдалгүй тахим авч энэ наадамд түрүүлэн маргааш нь аймгийн Засаг даргын захирамжаар аймгийн хурц арслан цол хүртсэн аж. Энэ бульхайтай барилдааныг МҮБХ-ны тэргүүлэгчдийн хурлаар авч хэлэлцээд уг наадамд шинээр цол авсан бөхчүүдийг хуучин цолоор нь эрэмбэлэх шийдвэр гаргажээ. Үүнийг тухайн үед бөхчүүдээс ганцхан Г.Баяржавхлан эсэргүүцэж шүүхдсэн бол бусад нь хүлээн зөвшөөрч. Гэтэл шүүхдэлцэх явцад аймгийн арслангийн өмгөөлөгчид бөхчүүдийг хуучин эрэмбээр нь барилдуулахаар шийдвэрлэсэн гэх хурал огт болоогүй тогтоол ч гараагүй болохыг олж тогтоосон гэнэ. Ингээд ердөө наадамын өмнөхөн МҮБХ-ны нбд Д.Цогтбаатар нь Г.Баяржавхлантай эвлэрлийн гэрээ байгуулж түүний 2012 оны Дундговийн наадамд түрүүлсэн амжилтыг нь хүлээн зөвшөөрч аймгийн наадамд нэг түрүүлсэн, хоёр шөвгөрснөөр тооцон аймаг цэргийн цолтой бөхчүүдийн эрэмбийн 125-рт эрэмбэлэхээр болж МҮБХ бууж өгчээ.
