Ардын намынхан ардын наадамыг ардуудаас булаан авчээ
Наадамаар морьдоо хасуулсан уяачид ёс заншлаа хүндэтгээд баяр өнгөртөл хэлээ хазсан бол одоо дуугарч эхэлжээ. Монгол эрлийз тусдаа уралдана хэмээн тогтсоныг дуулсан уяачид хаа холоос морьдоо тээж ирсэн ч маш олон цэвэр монгол адуу эрлийз хэмээн хасагдлаа. Тэгсэн атлаа баахан дэд сайдын хэн ч харсан эрлийз гэхээр адууг уралдуулж өнөөдүүл нь түрүүллээ. Баяр наадамын комиссын дарга У.Хүрэлсүх наадамын өмнө жинхэнэ ардын наадам цэнгэл хийнэ хэмээн яруу сайхан “донгодож” байсан. Гэтэл ачир дээрээ тэрээр эрлийз морьдтой баячуудын гар хөл байсныг уячид илчилжээ. Дундговь аймгийн УХ-ны тэргүүн, алдарт уяач Ц.Ганхүү нь дэд сайд нэртэй баян Г.Тэмүүлэнгийн эрлийз халтар азаргыг чухамдаа намых нь ах шадар сайд л шахсаар байгаад уралдуулсан гэж мэдэгджээ. Гэтэл уг эрлийзийг морины комисс монгол адуу биш гээд хасчихсан байсан ч эцсийн эцэст араас нь мордуулаад уралдуулжээ. Г.Тэмүүлэн НАМЗХ дотроо ч баячуудын фракцидаа хамаардаг бол уяачид дундаа ч дээд зиндаанд нь багтдаг гэсэн. Мөнгө ихтэй ч морь муу мэддэг гэх түүнд бас нэгэн алдарт уяач болох Эрдэнчулуун нь эрлийз халтарыг шарга азаргын төл хэмээн зарсан хэмээн уяачид шуугиж байна. Энэ тухайд бас л морьдоо хасуулсан уяач Л.Цандэлэг түрүү морио эрлийз гэдгийг хүлээн зөвшөөрөхийг Г.Тэмүүлэнгээс шаардсан удаатай. Ийнхүү Ардын намынхан ардын наадамыг ардаас булаан авч баячуудынх болгожээ.
