Өртэй МАН-АН засаг барьж чадах уу…
Өртэй хүн өөдөлдөггүй гэдэг. Мөн зах зээлийн үед өргүй хүн компани гэж хаа ч байхгүй гэх нь бий. Тэгвэл бизнес эрхлэгчидэд өр зээл байж болох ч улстөрийн намд асуудал өөр байх. Засаг барьж байгаа АН, МАН хоёр сонгуулийн босгон дээр хоюулаа өр зээлтэй түүнээсээ гарч чадаагүй байна. МАН-ын хувьд Г.Алтжингийн гэх нэг сая долларын нуухын аргагүй том өр бий. Тэгвэл түүний хажууд жижиг гэмээр өр шир нь тоймоо алджээ. Яг одоогийн байдлаар Бүргэд гэдэг хүнд сар бүр 10 сая төгрөг төлж байгаа тухай санхүүгийнхэн нь ам алджээ. Өнгөрсөн 3-р сард зээлдүүлэгч нь Ардын намаас 100 сая төгрөгөө нэхэмжилэн шүүхэд өгсөн тул арга буюу эвлэрч өрөө төлөхөөр гэрээ байгуулж. Харин ч харж үзэн хорин саяыг хассан агаад МАН эхний сардаа багтаан 30 саяаа төлж. Үлдэх 50 саяыг нь сар бүр 10 саяыг төлөн барагдуулж байгаа бололтой. Ардын нам Зандан ерөнхий гэдэг генсекийн үед их өр ширэнд орсон нь одоо бөөн дарамт болж байна. АН-аас 169 сая төгрөгөө нэхсэн “МВС” гэдэг компани бас л шүүхдэж. Тухайн үед намын генсек байсан Ц.Оюундарь хатагтайн гарын үсэг зурсан гэрээгээр эхлээд 40, 2015 оны 6-р сарын 30-ны дотор 60, он дуусахаас өмнө мөн 60 саяыг тус тус төлөхөөр тохирч. Гэсэн ч мөнгө нь орж ирээгүй байгаа гэнэ. Засаг барьж байгаа намын хувьд ч бас арга байдаг бололтой. Түүний нэг нь төрөөс авдаг санхүүжилт гэнэ. Өөр ч бас арга байдаг. Гэхдээ “Топууна” гэдэг компани энэ арганд ороод Ардын намынханд зад хууртагдаад баларсан. БЗД-ын намын хорооны барилгыг барьж өгсөн энэ компани төлбөрдөө барилгын талыг нь авахаар тохирсон байж. Гэсэн ч тухайн үед дүүрэгт засаг барьж байсан арга зальтай Ардын намыхан оронд нь том газар өгнө гээд барилгын талыг эзэмших эрхээс нь аятайхан татгалзуулчихсан. Хөөрхөн зальдуулсан компанийхан эцэстээ барилга ч үгүй газар ч үгүй болоод дууссан гэдэг.
NUUTS.mn
