МАН-ын удирдах ажилтны зөвлөгөөний яриа АН-ыхны дургүйг хүргэжээ
АН-ын Гүйцэтгэх зөвлөл МАН-ын зургаан сайдыг засгаас хөөж хамтран ажиллах гэрээг цуцлах шийдвэр гаргалаа. Үүнд нь хамгийн их дургүйцсэн хүмүүс нь өнөөх зургаан сайд дээр тэдний ажилд авсан 300 гаруй намын журмын нөхөд нь гэнэ. АН хамтрагчаа хүн муутай гэж буруутгасан нь үнэний хувьтай. Үүний тод жишээгээр саяхан болж өнгөрсөн МАН-ын удирдах ажилтны зөвлөгөөнийг дурдаж гаргаж иржээ. Энэхүү зөвлөгөөнөөр Ардын нам засагт хамтрасны ашиг тусыг ганцхан зүйлээр л голон ярьсан нь ирэх сонгуулийн бэлтгэл болгож АН-ыхныг “но”-г аль болох ихийг цуглуулах баримтжуулах явдал хэмээн дүгнэсэн гэнэ. Бүх шатны засаглалын түвшинд хамтарч ажиллаж байгаа Ардын намынхан сонгууль болтол зөвхөн эрх баригчдын “бөгсийг ухах” л ажил хийх бололтой. Явуулж хэрэгжүүлж байгаа ажлыг нь унагааж нурааж чаддаггүй юмаа гэхэд гацаах зогсоох, нэр нүүрийг нь барж улайлгахын хажуугаар сонгуульд хэрэг болох баримтыг ихээр цуглуулах аж. Удирдах ажилтны зөвлөгөөн дээр яригдсан гэх иймэрхүү утга агуулгатай ярианы тухай мэдээлэл АН-ын Гүйцэтгэх зөвлөлийн гишүүдийн хуралд ирсэн нь тэр дороо л олны саналыг эргүүлж ханилгаа муутай нөхдийг засгаас хөөх шийдвэр гаргахад хүргэсэн гэнэ.
