АН-ын Гүйцэтгэх зөвлөл МАН-ыг засгаас хөөх шийдвэр гаргалаа
Ардын намынхны эцсийн мөч хүртэл үгүй биз дээ хэмээн айн хүлээж байсан шийдвэрийг нь АН-ын Гүйцэтгэх зөвлөл гаргалаа. Зөвлөлийн дөнгөж сая өндөрлөсөн хуралдаанаас ханилгаа муутай МАН-ыг засгаас гаргах шийдвэрийг баталжээ. Ийнхүү шадар сайд тэргүүтэй Ардын намын зургаан “улстөрч” сайдын ширээндээ дасаж амжаагүй байтлаа суудлаасаа мултрах шугмандаа орлоо. Д.Оюунхоролын жуулчдын тоог нэг саяд хүргэх, С.Чинзоригийн хүн бүрийг ажилтай болгох гэх мэт “гэгээлэг” зорилгыг нь яахав гэхэд хоёр сайдын ажилд авсан баахан хүмүүс хөөрхий болов оо гэж. Тэд хэрэндээ л ажил албан тушаалтай болох гэж зардал гаргасан байгаа. АН-ын шинэ сайд нар ирээд л дуун дээрээ тэднийг халах нь мэдээж. Харин Н.Төмөрхүү, С.Чинзориг нарын намдаа өргөсөнхандив тусдамж, гишүүн болж чадаагүйн “хариу төлбөр” зургаахан сарын настай зуурдын сайдын ширээ байжээ. Д. Оюунхорол ч ялгаагүй болсон. Сайндаа л Д.Сарангэрэл нарын НАМЭХ-ны хэдэн хүүхнүүддээ “та нарыг бодвол би сайд хийж явсан хүн шүү” гэж томрох үгтэй хоцорлоо доо.
