Сэлэнгэ аймгийн Сүхбаатар сумын ЗДТГ-ын ажилтан албаны унаагаар Оросоос архи зөөгөөд баригджээ
Нийтэлсэн: 2015-06-23 05:45:40
Хойд хөрштэй визгүй зорчих болсоноос хойш хилээр хуурамч болон зөвшөөрөлгүй бараа нэврүүлэх хэрэг ихэссэн. Энэ хэрэгт төрийн албан хагчид хүртэл холбогдох болжээ. Хэрэгт холбогдох үедээ Сэлэнгэ аймгийн Сүхбаатар сумын ЗДТГ-д төслийн мэргэжилтнээр ажиллаж байсан Э.О гэдэг эмэгтэй ОХУ-аас худалдан авсан нийт 116 шилтэй 197.524 төгрөгийн үнэ бүхий согтууруулах ундааны зүйлийг үргэлжилсэн үйлдлээр Монгол улсын хилээр хууль бусаар нэвтрүүлсэн гэмт хэрэгтээ 251 цаг албадан ажил хийлгэх ялаар шийтгүүлжээ. Хилээр архи нэвтрүүлэхдээ “17-47 СЭА” дугаартай Сүхбаатар сумын ЗДТГ-ын өмчлөлийн бүр Засаг даргын албан хэрэгцээнд унадаг “тоёота креста” машиныг ашигласан гэнэ. Тамгын газрын ажилтан цагаан сараар байшин барьж дуусаад байшингийн найр хийх зорилгоор хойноос хүнсний бүтээгдэхүүн авахаар гарсан гэж мэдүүлжээ. Цагдаагийнхан шалгахад таван цагаан хайрцаг бүхий согтууруулах ундаа гарч иржээ. Гаргаж тоолоход нэг нь хайрцгандаа 20 ширхэг, нийт 100 шил согтууруулах ундаа гэж байсан гэнэ. Гаалийн журам ёсоор нэг хүн архи 1 л, дарс 2 л, шар айраг 3 л-ээс илүүгүйг улсын хилээр нэвтрүүлэхийг зөвшөөрдөг аж. Харин согтууруулах ундааны зүйлийг аж ахуйн нэгж улсын хилээр импортлохдоо аж ахуйн үйл ажиллагааны тусгай зөвшөөрлийн тухай хуулийн дагуу согтууруулах ундааны тусгай зөвшөөрөл буюу лиценз авч улсын хилээр нэвтрүүлдэг хуультай аж.
NUUTS.mn
