Бие даагчид мэдээлэл хийлээ
УИХ-ын гишүүн С.Ганбаатар, Ц.Даваасүрэн, Х.Болорчулуун нар өнөөдөр сэтгүүлчдэд мэдээлэл хийлээ. УИХ-аар Эрүүгийн хуулийн шинэчилсэн найруулгын төслийг хэлэлцэж эхэлсэн. Уг хуулийн төсөлд засах шаардлагатай заалтууд туссан тухай УИХ-ын гишүүн Ц.Даваасүрэн онцоллоо. Тухайлбал, төрийн эрх мэдлийг хууль бусаар авах гэсэн зүйл ангиар Чингисийн талбайд болсон цуглаан дээр очоод хашгирсан иргэн 12-20 жилийн хорих ял авч болзошгүй гэнэ. Энэ нь төрийн эрх мэдэлд янз бүрийн аргаар хүрсэн хойноо түүнийгээ хамгаалахын тулд эргээд иргэдэд илүү халтай заалт нэмж шинээр тусгасан байгаа тул үүнийг өөрчлөх шаардлагатай гэж үзэж байна. Мөн сонгуулийн үеэр мөнгө тараахыг гэмт хэрэг биш гэж үзэх нь буруу, ард түмнээ мөнгөгүй чангалж, чангалж, сонгууль дөхөнгүүт мөнгө тараах болж байна гэсэн юм. Дубайд зурагдсан Оюутолгойн далд санхүүжилтийн төлөвлөгөөтэй холбоотойгоор Ерөнхий сайдад асуулга тавьсан ч хоёр долоо хоног хойшлуулсан байна. Дээр нь валютын ханш чангарсан нь Дубайн гэрээний тар танигдаж эхэлж буй илрэл. Зориудаар валютын ханшийг 10 хоног бууруулсан нь эргээд өсөн байна. Дээр нь нэмж 1 тэрбум ам.долларын зээл авах тухай ярьж эхэллээ. Зээлийн ихэнх нь өмнөд хөршөөс орж ирнэ. АН, МАН Засгийн газарт хамтрах үедээ өр зээл нэмж тавихгүй гэж мэдэгдсэн ч түүндээ хүрсэнгүй гэлээ. УИХ-ын гишүүн Х.Болорчулуун өнгөрсөн долоо хоногт УИХ-аар Гацууртын ордын төрийн эзэмшлийн хувь хэмжээ тогтоох тухай УИХ-ын тогтоолын төслийг хэлэлцээд буцаасан нь зөв. Засгийн газар дахин төсөл өргөн барихгүй болов уу хэмээн найдаж байна. Гацууртын ордыг ашиглах шийдвэр гаргавал Ноён уулан дахь түүхийн дурсгалт өвүүд устах эрсдэлтэй гэсэн юм. УИХ-ын гишүүн С.Ганбаатар Монгол Улсын Ерөнхийлөгчөөс өргөн мэдүүлсэн Хүүхэд харах үйлчилгээний тухай хуулийн төслийг УИХ батлах ёстой. Олон мянган хүүхэд цэцэрлэгт хамрагдаж чаддаггүй. Дээрх хууль батлагдсанаар тэдгээр хүүхдүүд гэрээр харах үйлчилгээнд хамрагдаж, мөн олон эмэгтэй ажлын байртай болох бололцоотой болно гэдгийг тодотголоо.
NUUTS.mn
