Танктайгаа онхолдож нэгнийгээ хөнөөсөн танкчдын хэрэг юу болов ?
Нийтэлсэн: 2015-06-05 04:19:35
Өнгөрсөн жилийн өдийд Зэвсэгт хүчиний танк онхолдож дээр нь сууж явсан нэг хүн амиа алдсан хэрэг гарсан. Энэ осол Говьсүмбэр аймгийн Баянтал суман дахь Зэвсэгт хүчний 011-р ангид болсон. Тухайн үед Т-72А1 танкийг засварлаад өөр анги руу шилжүүлэх гэж байжээ. Энэ хэрэгт мөрдөн байцаалтаар Зэвсэгт хүчний жанжин штабын Цэргийн хангалт үйлчилгээний газрын инженер техникийн хэлтэст хуягт танкийн мэргэжилтэнО.М болон Зэвсэгт хүчний 016-р ангийн танкийн батальонд ротын ахлагч ажилтай Б.М нарыг буруутай гэж тогтоожээ. Б.М-ыг байлдааны тусгай зориулалттай техник жолоодох ашиглах журам зөрчсөнөөс хүний амь хохироосон, офицер О.М-ийг цувааны чиглүүлэгч офицерын үүрэг гүйцэтгэн аюулгүй ажиллагааны зааварчилгааны биелэлтийг хангуулан ажиллахдаа хуваарилах механизмд гэмтэлтэй байсан Т-72А1 маркийн танкийг засварлаж дуусган шалгаж үзэхээр жолоодон гарах үед танкны их бие дээр ил суусан хүмүүсийг буулгах арга хэмжээг авалгүй хөдөлгөөнийг үргэлжлүүлэх боломж олгосон гэж яллажээ. Механик жолооч нь танкны хурдны хайрцгийн арааг 1-7 дугаар байрлалд шилжүүлэн бетон хучилттай замаар явах үедээ танкны баруун талын эргэлтийн хөдөлгүүрийг төгсгөлийн байрлалд татаж буцааж түлхэхдээ баруун талын хөшүүргийг хоцорч түлхнээс танк баруун тийш шарваж, удирдлага алдагдан замаас гарч хөрстэй харьцах үед зүүн талын гинжээр газрын хөрсийг түрж гулсан танкийн хүндийн төв зүүн талд шилжин өөрчлөгдсөнөөс хөмөрч унан танкийн гадна их бие дээр сууж явсан Г.Г нь танкны цамхагт дарагдан амь насаа алдсан. Гайхалтай нь Оросоос ирсэн тэдгээр танкууд нь бүгдээрээ анх ирэхдээ хурдны хайрцагны тохиргоо нь алдагдсан байсан гэж чиглүүлэгч офицер баталжээ. Хойд хөрш урьдын адил манайд эвдэрхий хуучин байлдааны хэрэгслээ өгдөг хэвээрээ аж. Танкны их бие дээр дөрвөн хүн ил сууж явсанаас гурав нь бэртэж нэг нь амиа алджээ. Тухайн үед танк нь 50км/цагийн хурдтай явсан гэнэ.
NUUTS.mn
