Сая жуулчин хүлээн авах сайд хатагтай одоо л жуулчлалын хөтөлбөрөө боловсруулж дуусжээ
Зуны эхэн сар гараад юу юугүй Наадам дөхлөө. Аялал жуулчлалын улирал аль хэдийн эхэлсэн ч хотын гудамжинд гадныхан цөөхөн л харагдана. Уг нь БОНХАЖ-ын сайд нь сая жуулчин хүлээн авна хэмээн амласан тал бий. Тэр амлалт “ёсоор” өдийд шар толгойтнууд япон солонгосчууд Улаанбаатараар багтаж ядаж байх учиртай. Гэтэл сая жуулчин хүлээж авах улсын бэлтгэл ажил яагаа ч үгүй байна. Саяхан яам нь аялал жуулчлалыг хөгжүүлэх хөтөлбөрөө боловсруулаад өргөн барьжээ. Хаалттай социализмаас нээлттэй нийгэмд шилжээд дээр нь аялал жуулчлалыг эдийн засгийн тэргүүлэх салбар хэмээн зарлаад хориод жил өнгөрч байхад хэрхэн яаж хөгжүүлэх хөтөлбөрөө ч боловсруулаагүй байсан болж таарах нь. Д.Оюунхорол сайдын өмнөх олон мундаг нөхдүүд салбарын яам удирдаж байхдаа юу хийж байсан болж таарах нь вэ…хэдэн хуудас цаас бичээд УИХ-аар батлуулаагүй л сууж байсан бололтой. Одоо Д.Оюунхоролын боловсруулсан аялал жуулчлалыг хөгжүүлэх хөтөлбөрийг хэлэлцээд батлаад ажил хэрэг болгох гэсээр байтал зун өнгөрөөд намар болоод тэгээд л мартагдана. Салбарын сайд хатагтай жуулчдын тоог нэмэгдүүлнэ гэж байхад Үлэг гүрвэлийн музейн орон тоог тал хувиар нь цомхотгочихсон гэнэ. Энэ мэтээ халах цомхотгох ажил хийсээр ирэх хавар буюу сонгуулийн жилд сая жуулчин авчирна хэмээн хэмээн улстөрч хатагтай томоос том шоу хийх байх даа.
NUUTS.mn
