“Орчлон” сургууль канад багш нараа гомдоожээ
Нийтэлсэн: 2015-05-08 04:50:22
Олондоо нэртэй “Орчлон” бүрэн дунд сургууль нь гадаад багш нараа гомдоогоод бөөн юм болжээ. “Орчлон” бүрэн дунд сургуулийн захирал Д.Батмөнх нь Канадаас ирсэн хоёр багштай 2013 онд хоёр жилийн хугацаатай хөдөлмөрийн гэрээ байгуулж. Тэрхүү гэрээ нь эн зуны сүүлээр дуусах гэнэ. Гэтэл монгол сургуулийн захиргаа нь өнгөрсөн өвөл гэрээндээ нэмэлт өөрчлөлт дур мэдэн оруулж анхны гэрээгээр олгогдсон багш нарыг эрхийг нэлээд дордуулжээ. Гэрээний өөрчлөлтөөр авах цалин урамшуулал нь хасагдаж эдлэх хөнгөлөлт нь танагдсан гэнэ. Тэгээд ч гэрээний хугацаа дуусахаас хэдхэн сарын өмнө буюу явах дөхөөд ирэхэд нь өөрсдөдөө ашигтай ажиллагаа явуулсан гэж гадаад багш нар гомджээ. Гадныхан монгол удирдлагатайгаа хэрэлдэж маргадахын оронд шүүхэд хандаж “соёлт аргаар” асуудлаа шийдэх гэж. Энэ нь ажилтнуудаа аагалдаг захиргаанд “жаахан” эвгүйн дээр сургуулийн нэрэнд ч муухай тул бушуухан эвлэрчээ. Ингээд хоёр багшид урамшууллын мөнгө болох нэг сарын цалинтай нь тэнцэх урамшуулал өгөхөөр болж бууж өгчээ. Мөн буцах онгоцны тийзийг нь даахаар болж. Байрны түрээсд нь өгдөг мөнгөө явтал нь төлөхөөр болсон төдийгүй хоёр багшийн өмгөөллийн зардалд төлсөн хоёр мянган долларыг ч хүртэл нөхөн төлж өгөхөөр болжээ. Ийнхүү “Орчлон” бүрэн дунд сургуулийн захиргаа гадаад багш нараа “дээрэлхэх” гээд өөрсдөө “шалдаа буужээ”. Энэ нь бас л гадныханд гаргадаг монгол хандлагын нэг шинж гэлтэй. Гоё сайхан амлалт өгч ирүүлчихээд буцах дөхөнгүүт нь амласнаа өгөхгүй унжих нь том сургуулийн хувьд муухай л хэрэг юм.
NUUTS.mn
