Нууц мэдээллийн уурхай

МХЕГ-ыг шинэ дарга удирдаж байгаа. Өмнөх үед урхагшсан олон гажуудал завхралыг засаж чадах эсэхийг цаг хугацаа харуулах байх. МХЕГ-д архагшсан хамгийн ноцтой завхралын нэг нь бизнесийн бүлэглэл  хоорондын маргаан, дотоод зөрчилд төрийн эрх мэдлээ ашиглан оролцдог дэвэргэдэг явдал юм. Бүр нэг талд нь илт үйлчилж өрсөлдөгчөө дарах зайлуулах гэсэн зорилгод нь гар хөл болдог. Үүний нэг жишээг МХЕГ-ын өмнөх удирдлагын үед гарсан “Монболгаргео”-гийн хэргээс харж болно. Тухайн хэрэгт МХЕГ-ын дарга Д.Батмөнх, дэд дарга Т.Эрдэнбилэг нар сөргөлдөгч хоёр талд орсон байж болзошгүй баримт харагддаг. Үйл явдлыг өгүүлэхэд "Монголболгаргео" компанийг Болгар улсын  50%, Монгол Улсын 50%-ийн хөрөнгө оруулалттайгаар 1998 онд байгуулжээ. 2011 онд Монголын өмчлөлийн төрийн мэдлийн 85420 ширхэг хувьцааг худалдсныг БНХАУ-ын 100 хувийн хөрөнгө оруулалттай “Жинлиань” худалдан авч. Гэсэн ч тус компаний дүрэмд өөрчлөлт оруулж , улсын бүртгэлд бүртгүүлээгүй байгаа гэнэ. Ингээд  “Жинлиань”-ний Л.Ундрах, Д.Лхагвасүрэн нар болон “Монголболгаргео”-ийн гүйцэтгэх захирал Л.Пүрэвгял, Ж.Пүрвээ гэсэн хоёр удирдлагатай болжээ. Тэд одоо ч гэсэн бие биенээ компаний эрхийг ууль бус аргаар булаан авч алт олборлох үйл ажиллагаа явуулсан, татвар ногдох орлогыг нуун дарагдуулж, хууль бусаар олборлосон алтаа буюу орлогоо нуун дарагдуулж “Монголболгаргео”-г ихээхэн хэмжээний өрөнд оруулсан гэх зэргээр  буруутгадаг. Өдгөө шүүхийн шатны маргаанаар хууль ёсны захирал нь Л.Пүрэвгял мөн гэж тогтоогдож. Үүнийг нь “Жинлиань”-ийхан хүлээн зөвшөөрдөггүй бөгөөд түүнийг “Монголболгаргео"-гийн эд хөрөнгийг албан тушаалаар урвуулан ашигласан гэх гэмт хэрэгт холбогдуулан Баянхонгор аймгийн цагдаад эрүү үүсгүүлжээ. Учир нь энэ аймагт булаацалдаад байгаа алтны орд нь байдаг гэнэ. Энд нь нөгөө тал нь алт олборлоод байгаа тул Л.Пүрэвгял нь  “Жинлиань”-ний  хууль бус ажиллагаанд хяналт тавьж уулын ажлын төлөвлөгөөг батлахгүй түр түдгэлзүүлж байх хүсэлтийг АМГ, МХЕГ-д тавьж хөөцөлджээ. Түүний гомдлийг МХЕГ-ын дэд дарга Т.Эрдэнэбилэг хүлээн аваад Баянхонгор аймгийн МХГ-аар шалгуулан алт олборлолтын үйл ажиллагаа явуулж байсныг нь зогсоож  тоног төхөөрөмж, машин механизмыг нь лацаджээ. Лацдуулсан “Жинлиань”  нь эргээд МХЕГ-ын дарга Д.Батмөнхөд гомдол гаргаж. Мөн дэд даргыг нь АТГ-д өгчээ. "Жинлиань" компаниий гомдлын дагуу АТГ-аас Т.Эрдэнбилэгийн үйлдэлд ашиг сонирхлын зөрчил магадгүй гэсэн үндэслэлээр шалгах тухай албан тоот иржээ. Харин Д.Батмөнх үүнд нь тулгуурлан "Монголболгаргео" -ийн хэвийн үйл ажиллагааг тасалдуулах нь үндэслэлгүй" гээд тус компаний алт олборлолтын үйл ажиллагааг “хүчин төгөлдөр хууль тогтоомжийн хүрээнд үргэлжлүүлэхийг” Баянхонгор амйгийн МХГ-д даалгажээ. Ингээд “Жинлиань”-ний захирал Л.Ундрахын итгэмжлэгдсэн төлөөлөгч Д.Лхагвасүрэн нар нь лацадсан лацыг авч алт олборлолтоо эхлүүлжээ. Ийнхүү нэг талын гомдлоор дэд дарга нь алтны уурхайг хаасан байхад нөгөө талынх нь хүсэлтээр дарга нь нээж өгсөн хэрэг гарч./үргэлжлэл бий/

 

NUUTS.mn