“Нийслэл Өргөө”-гийн 26 багийн төвийн нэгийг нь Засаг дарга асан С.Хавал хувийн газартаа бариулсан гэжээ
Нийтэлсэн: 2015-04-10 02:50:51
С.Батболдыг Ерөнхий сайд байхад “Нийслэл өргөө” компани нь ЗГХЭГ-ын захиалгатай, Баян-Өлгий аймагт хэрэгжүүлэх “Багийн хөгжлийг дэмжих” хөтөлбөрийн хүрээнд улсын төсвийн хөрөнгөөр 26 багийн төвийн байр барих барилга угсралтын ажлыг барьж гүйцэтгэх тендерт оролцон ялж 1.5тэрбумыг улсын төсвөөс авсан. Гэхдээ 19 багийн төвийн байрыг 526.6 саяар барьсан боловч 26 багийн төвийн байрыг барьсан хэмээн улсын комисст хүлээлгэн өгч, 827.3 сая төгрөгийг завшиж үрэгдүүлсэн гэж яллагдсан. Тухайн үед Баян-Өлгий аймгийн Засаг даргаар ажиллаж байсан С.Хавалыг хуулиар олгогдсон албаны эрх мэдлээ хэтрүүлэн “Нийслэл өргөө” нь аймгийн сумдад багийн төвийн байрны барилга угсралтын ажлыг эхлүүлж гүйцэтгэхдээ зохих зөвшөөрлийг аваагүйг мэдсээр байж, мөн багийн төвийн барилгын ажилтай биечлэн танилцалгүйгээргүйцэтгэгч компаний бүрдүүлж өгсөн баримтыг үндэслэн барилгын ажлын гүйцэтгэлийг 2 удаа баталгаажуулсан, мөн улсын комиссыг байгуулсан тухай 614 дугаартай захирамж гарган, улмаар 26 багийн төвийн барилга байгууламжийг ашиглалтад хүлээн авсан улсын комиссын актыг хууль бусаар гаргуулснаас хүнд хор уршиг учруулсан хэрэгт буруутгасан. Анхан шатны шүүхээс С.Хавалд гурван жилийн тэнсэн харгалзах ял оноосныг давж заалдах шатны шүүх хэвээр баталсан. Дээд шатны прокурор нь анхан шатны шүүхийн шийдвэрийг эсэргүүцэж “…С.Хавалд холбогдох заалтууд нь шүүх хэрэглэх ёсгүй хуулийг хэрэглэсэн буюу Эрүүгийн хууль буруу хэрэглэн шийдвэрлэсэн,
хэргийн улмаас учирсан хохирлын 843.1 сая төгрөг төлөгдөөгүй, гэм хор арилаагүй байхад түүнд оногдуулсан хорих ялыг тэнсэж, хянан харгалзахаар шийдвэрлэсэн нь ял хөнгөдсөн” гэсэргүүцсэн. Шүүх хурлын үеэр нэгэн сонирхолтой баримт илэрсэн нь “Нийслэл Өргөө” компаний барьсан гэх багийн төвийн нэгийг нь Засаг дарга асангийн хувийн газарт барьсан гэнэ. Энэ тухай Б.Ганзоригийн өмгөөлөгч “…Баян-Өлгий аймагт 26 барилга барьж гүйцэтгэсэн нь хавтаст хэрэгт авагдсан баримтуудаар нотлогдсон, үүнээс 7 барилгыг анхан шатны шүүх үнэлж, дүгнэлгүй орхисон, энэ 7 барилгыг үнэлүүлж 827 сая төгрөгийн хохирлын дүнгээс хасуулах хүсэлтийг өмгөөлөгч гаргасаныг хангалгүй хэргийг шийдвэрлэсэн нь их учир дутагдалтай болсон байн, 7 барилгаас нэг барилгыг нь Засаг дарга өөрийн хувийн газар дээр барьсан, 1 барилга нь 70 хувийн гүйцэтгэлтэй байгаа” гэж мэдэгджээ. “Нийслэл Өргөө” компаний багийн төвийн барилгын ажлыг газар дээр нь удирдан гүйцэтгэж байсан Б.Ганзоригийн дүү Д.Чулуунцэцэг Засаг даргын хувийн өмчийн газар гэдгийг мэдээгүй баймааргүй юм. Эсвэл энэ нь барилгын ажлын гүйцэтгэлийг 2 удаа баталгаажуулах мөн 26 багийн төвийн барилга байгууламжийг ашиглалтад хүлээн авсан улсын комиссын актыг хууль бусаар гаргуулахын “урьдчилсан нөхцөл” байсан юм биш биз гэсэн хардлагыг төрүүлж байна.
NUUTS.mn
