НАМЗХ-ны Л.Оюун-Эрдэнийн нэрлэсэн ”зарчимгүй үйлдэлтэй нөхөд” хэн бэ ?
Н.Номтойбаяр хичнээн үгүйсгэсэн ч НАМЗХ хуваагдлын ирмэгт тулсан нь үнэн болж таарчээ. Одоогоор хөрөнгөлөг элит давхаргаас гаралтай “угсаа залгамжлагч хунтайж” нар болон жирийн “харц ардын” залуусаас бүрдсэн хуучны Бошгыг халах халах залуус маягийн Эвлэлийнхэн гэж ерөнхийд нь ойлгож болно. НАМЗХ-ны хуваагдлын гол шалтгаан нь аль эртнээс эхэлсэн хөрөнгө мөнгө, нийгмийн давхаргын ялгаралаар тодорхойлогдсон хоёр туйл рүү чиглэсэн татагдал байжээ. Элит залуус нь мэдээж хөдөө юм уу эсвэл Баянхошуу “гаралтнуудаа” өөртөө багтаасангүй. Харин нөгөө тал нь мөнгөтэй хөрөнгөтэй залуусын гарын дохиогоор хөдөлдөг хүүхэлдэй байх хүсэлгүй гэнэ. Одоо ч гэсэн үзэл баримтлалаа тодорхойлж чадаагүй МАН-ын залуус үзэл санаа, үнэт зүйлс бодлого хөтөлбөрийн ялгаагаар бус харин хөрөнгө чинээ зиндаа давхаргаараа л хуваагдана. Америкд сурдаг гэх НАМЗХ-ны ерөнхийлөгч Л.Оюун-Эрдэнэ нь гэнэт яаран ирсэн. Уг нь оюутан хүний хувьд хавар цаг шалгалт шүүлэгдээ бэлтгэх гээд завгүй маш чухал үе. Харин тэрээр яаран ирэх болсон шалтгаанаа “чоно борооноор” гэж тайлбарлажээ. Тэр “чоно” нь явж явж Н.Номтойбаяр дээр бууж байна. Одоогоор НАМЗХ-ны ерөнхийлөгчийн үүрэг гүйцэтгэгч тэрээр жинхлэх санаатай байгаа нь нууц биш болсон. Гэхдээ залуусын энэ “зодооныг” дээрээс нэг том бурхи ажиглан суугаа нь У.Хүрэлсүх юм. Эрх мэдэл нь улам бүр ихсэж байгаа түүний зөвшөөрөлгүйгээр МАН-д ямар нэгэн ажиллагаа явагдахгүй байгаа. Магадгүй тэрээр өөрийнх нь туслалцаагүйгээр Л.Оюун-Эрдэнэ Номт хүүг дарж чадах эсэхийг хэсэг зууртаа харж байж ч болох юм.
NUUTS.mn
