“Байлхагва” компанийхан 14 давхраас унаж амиа алдсан охиныг өөрөө ослын бүсээ зүүгээгүй байсан гэж буруутгажээ
Нийтэлсэн: 2015-04-02 02:37:26
Барилгын компаниуд осол гаргачихаад хэргээс мултрахын тулд хүний үнэргүй зан гаргадаг болжээ. Энэ явдал Есүгэн охины хэрэгт тод харагдсан бол “Байлхагва” компаний осолд ч бас давтагджээ. 2014 оны 9-р сарын 22-нд Баянзүрх дүүргийн 26-р хорооны нутаг дэвсгэрт баригдаж байгаа “Илсон девелормент” компаний туслан гүйцэтгэгч “Байлхагва” компаний ажилтан С.С нь 14 давхарт ажиллаж байхад нь дүүжин өргүүрийн тросс тасарнаас унаж амиа алдсан аймшигт хэрэг гарсан. Талийгаач нь ердөө 18-хан настай Архангайн охин байжээ. Гэтэл энэ хэрэгт анхнаасаа л аюулгүй ажиллагааны зааварчилгааг байнга өгч байсан, хохирогч өөрөө хамгаалалтын бүсээ бүсэлж зүүгээгүй болоод явчихжээ. Талийгаач өөрө анхаарал болгоомжгүй байсан байж болно. Гэхдээ дөнгөж ажилд орсон туслах ажилтан, бүр эмэгтэй хүүхдийг 14 давхарт ажиллуулах бөх зүрх гаргаснаа компаний захирал Б.Лхагвасүрэн, бригадын дарга Г.Өлзийбат нар нь маш харицлагүйгээр тайлбарлажээ. Бригадын дарга Г.Өлзийбат нь өндөрт туршлагатай ажилчин ажиллах ёстой гэдгийг мэддэггүй байсан гэнэ. Гэтэл ном журам ёсоороо эмнэлэгийн урьдчилсан үзлэгт тэнцсэн, 1-ээс доошгүй жил өндөрт ажилласан туршлагатай, мэргэжлийн 3-аас доошгүй зэрэгтэй ажилчид, инженер техникийн ажилтнууд л өндөрт бие даан угсралтын ажил гүйцэтгэх ёстой байжээ. Мөн анх удаагаа өндөрт ажил гүйцэтгэх зөвшөөрөл олгосон ажилчинг аж ахуйн нэгж, байгууллагын захиргааны тушаалаар томилогдсон туршлагатай ажилтны байнгын хяналтын дор нэг жилийн хугацаанд ажиллуулна гэсэн заалт ч зөрчигдөж. “Байлхагва” компаний захирал Б.Лхагвасүрэн нь хүн хүч дутуу тул нэмж ав хэмээн үүрэг өгсөний дагуу бригадын дарга нь амаар тохиролцоод 18-хан настай охиныг 14 давхарт ажиллуулахаар гаргажээ. Шалгалтаар захирал, бригадын дарга хоёр ажиллагсдыг өөрсдөө бүрдүүлэн авахдаа ямар нэгэн гэрээ, тушаал гаргаагүй, мэргэжлийн үнэмлэх, ажлын туршлагыг харгалзахгүйгээр авч ажиллуулсан байжээ. 14 давхраас унасан хохирогч эмнэлэг хүрэлгүй замдаа нас баржээ. Эмэгтэй хүн нямбай хийдэг, хохирогч өөрөө хамгаалалтын бүсээ бүслээгүй гэсэн захирал Б.Лхагвасүрэн, бригадын дарга Г.Өлзийбат нарт нэг жилийн тэнсэн харгалзах ял оноожээ.
NUUTS.mn
