Монголын тариаланчдын холбоо”-ны төлөөлөл Р.Бурмаа сайдтай уулзсан ч учраа сайн ойлголцож чадалгүй тарлаа
Нийтэлсэн: 2015-03-30 06:19:14
Хүнс, хөдөө аж ахуйн сайд Р.Бурмаа өчигдөр “Монголын үр тариа эрхлэгчдийн газар тариалангийн холбоо”, “Монголын тариаланчдын холбоо”-ны төлөөлөлтэй уулзлаа. Уулзалтаар тус салбарт үүсээд буй нөхцөл байдлын талаар ярилцаж хаврын тариалалтаас өмнө талууд ойлголцлын зөрүүгүй болж ажлаа эхлүүлэхийг чухалчилж байсан ч чадсангүй. Тодруулбал, Хүнс, хөдөө аж ахуйн яам ОХУ-аас буудай импортлох шийдвэр гаргасан. Үүнийг тариалан эрхлэгчид эсэргүүцэж байгаа. Учир нь дотоодод хангалттай буудай байгаа учраас гаднаас авах шаардлага байхгүй гэж үзэж буй. Хэрвээ гаднаас буудай импортоор авбал дотоод дахь буудайнууд зах зээлд худалдаалагдаж чадахгүй ялзарч, муудах аюултай хэмээн тариаланчид ярьж байгаа. Үүнээс болж дотоодын тариалан эрхлэгчид алдагдалд орно. Тиймээс Р.Бурмаа сайдыг уг шийдвэрийг эсэргүүцэж тариалан эрхлэгчид трактортай жагсаал хүртэл зохион байгуулсан юм. Харин яамны зүгээс тэднийг цавуулаг ихтэй буудай тарьсан учраас гаднаас нөхөж авахаар болсон гэсэн тайлбарыг хийж буй. Энэ мэт асуудлаа шийдэхээр өчигдөр тус салбарынхан Р.Бурмаа сайдтай уулзсан ч төдийлөн учраа сайн ойлголцож чадалгүй тарлаа.
NUUTS.mn
