УБТЗ-ын дарга нар өөрсдийн алдааны төлөө “Ган зам” сонины сэтгүүлчийг халжээ
Нийтэлсэн: 2015-03-27 03:12:53
Монгол-Оросын хувь нийлүүлсэн УБТЗ сүүлийн хэдэн жил алдагдалтай ажиллаж байгаа. Үүний хариуцлагыг жирийн ажилтан ажилчид бус харин өндөр цалин хангамж, эрх ямба эдэлдэг дарга нар нь хүлээх учиртай. Гэтэл ажлаа муу хийж амжилтгүй ажилласны төлөө дарга нар бус харин цэрэг нар нь хариуцлага хүлээдэг гажиг жишиг энд архагшжээ. Төмөр замыг алдагдалтай ажиллуулж олон арван хүнийг халах болсон буруугаа “Ган зам” сонины жирийн сэтгүүлчид үүрүүлэн ажлаас нь халсан хэрэг оны өмнөхөн гарчээ. Монгол-Оросын хувь нийлүүлсэн нийгэмлэг Улаанбаатар төмөр замын “Ган зам пресс” төвийн сэтгүүлч А.Д нь “Ган зам” сонинд үр бүтээлтэй ажилласаар иржээ. Тэрээр сонины 2014 оны 3 дугаар сарын 11-ний өдрийн 11 тоот дугаарын тэргүүн ба тавдугаар нүүрэнд “УБТЗ өмнөх жилийнхээс 2.7 сая тонн транзит ачаа илүү тээвэрлэнэ”, мөн тавдугаар нүүрэнд “УБТЗ 13 сая тонн транзит ачаа тээвэрлэнэ” гэсэн нийтлэл гаргасан гэнэ. Гэтэл үүнийг нь төмөр замын удирдлага нь "Хөдөлмөрийн гэрээнд заасан ажил олгогчийн эсрэг хууль бус үйл ажиллагаа явуулсан” гэж үзэн ажлаас нь халжээ. Тухайн үед УБТЗ нь транзит ачаа тээвэрлэх нь багасаад алдагдалтай ажиллаад нийгмийн салбараа цомхотгох шаардлага гарч, цалин хөлсөө тавьж чадахгүй хүнд байдалд ороод байтал салбарын хэвлэл нь УБТЗ маш их мөнгөтэй болчихлоо гэсэн мэдээлэл тараасан нь байгууллагын эсрэг хууль бус үйл ажиллагаа явуулсан болж таарсан гэнэ. А.Д-гийн бичсэн нийтлэлтэй дугаар гардаг өдөр УБТЗ-ын удирдлага байгууллагийн хэмжээгээр нийт 70 гаруй хүнийг халах өргөн хэмжээний цомхотголын компанит ажил өрнүүлэхээр зэхэж байсантай яг давхацсан аж. Хамгийн их хүнийг Удирдах газраас халах гэж байсан нь ихээхэн эсрэгүүцэлтэй тулгараад байсан гэнэ. Урьд өдөр нь хурал хийж олноор нь халах болсон, мөн үлдсэн хүмүүсийн цалинг цаашид хугацаанд нь тавихад хүндрэлтэй болсон тухай танилцуулсан тул Удирдах газар даяар үймээн шуугиантай байжээ. А.Д-гийн бичсэн нийтлэл нь том хэмжээний цомхотгол хийж байгаа үед эсрэгээрээ УБТЗ маш их ашигтай ажилладаг гэсэн ойлголтыг УБТЗ даяар төрүүлсэн, ер нь бараг л “санаатай үйлдсэн хорлон сүйтгэх ажиллагаа” хэмээн дарга нар нь сүржигнэж гарчэээ. Ингээд энэ ноцтой хэргийг Хөдөлмөрийн гэрээ, Боловсон хүчин, нийгмийн асуудал эрхэлсэн Замын орлогч дарга Ч.Мижиддоржийн удирдсан шуурхай хурлаар авч хэлэлцээд “ноцтой алдаа гаргасан” гэх “Ган зам” сонины сэтгүүлчийг ажлаас нь халжээ. Энэ нь нэг ёсондоо “нохой сүүлээ сүүл хонгорцогоо” гэдэг шиг явдал болж. УБТЗ-ын дарга нар эдийн засгийн хүндрэлийн үед оновчтой менежмент явууулж чадаагүй, хэмнэлт хийх боломжийг бүрэн дүүрэн ашиглаагүй, улстөрийн болон албан тушаалын шахаагаар удирдах бүтцийг хэт данхайлгаж захиргааны зардлыг өсгөсөн зэрэг бүх алдаагаа жирийн нэг сэтгүүлчид тохоод халсан нь дэндүү шудрага бус явдал гэнэ.
NUUTS.mn
