Нууц мэдээллийн уурхай

Монголд гэр бүлийн хүчирхийллийн хэрэг нэлээд хаагдмал байсаар ирсэн. Ёс уламжлалаа даган гэр бүлийн нэр хүндээ хамгаалах сэтгэлзүй хүчтэй байдгаас гадна нутаг усныхаа нэрийг муугаар гаргалаа гэх дарамтанд ордог тул нуугаад дараад өнгөрдөг. Энэ мэт олон шалтгааны улмаас гэр бүлийн хүчирхийллийн хэрэг нэг гэр бүл эсвэл нэг жалга  нэг сумын дотор дарагдаад өнгөрдөг байсан. Мөн Үндсэн хуулинд заасан эцэг эх, хамаатан садныхаа эсрэг мэдүүлэг өгөхгүй байх эрх ч дэм болдог. Хуулиараа эцэг эх эсвэл хамаатан садныхаа эсрэг мэдүүлэг өгөхийг шаардах эрх мөрдөн байцаагчид болон шүүгчид олгогдоогүй. Хэрвээ аавынхаа эсрэг мэдүүлэг өгөхгүй гэвэл шаардах шахах эрхгүй байдаг. Тэгвэл сүүлийн үед үр хүүхдэд нь гэр бүлээ байнгийн айдас хүчирхийлэлд оруулдаг аав нарыхаа эсрэг мэдүүлэг сайн дураараа өгдөг болсныг хуулийнхан олзуурхан ярьж байна. Ингэснээр гэр бүлийн хүчирхийллийн олон гэмт хэрэг нотлогдож  хуулийн дагуу шийдэгдэж байгаа гэнэ. Өвөрхангай аймгийн Тарагт сумын Шовхын хоолой гэдэг газар нутагладаг Ч.П нь  эхнэрээ байнга зодож тарчлаах гэмт хэрэг үйлдсэн нь хүүхдүүдийнх нь мэдүүлгээр батлагджээ. Охин П.М нь “би айлын бага охин, намайг ухаан орсноос хойш аав согтуу ирэхдээ гэрийхэндээ агсан тавьдаг, хэл амаар доромжилдог, ээжийг зоддог байсан, сүүлдээ эрүүлдээ хүртэл зоддог болсон, бид нар жаахан байхдаа аавд хөөгдөж туугдан эмээгийнд олон удаа очиж байсан, оюутан болоод явсан хойно ч ээжийг зоддог нь хэвээрээ байсан, аавыг согтуу ирэхээр их айдаг” гэж мэдүүлжээ. Хүү П.Д нь “аав ээжийг бургасаар цохин духыг нь язалсан, 2013 онд аав согтуу ирээд ээж бид хоёрыг хөөхөд гадаа машинд хонож байсан” гэжээ. Ийнхүү харгис нөхөр гэр бүл эхнэрийнхээ биемахбодь сэтгэл санааны эсрэг чиглэсэн хүчирхийлэл байнга хэрэглэж ирсэн нь батлагдаж түүнийг бусдыг тарчлаасан хэмээн 1.5 жилийн хорих ял оноосон ч тэнсэн харгалзжээ. Булган аймгийн Рашаант сумын 2-р багийн иргэн Ц.Б нь эхнэрээ 2010 оноос эхлэн байнга зодож хэл амаар доромжилох, ажлын байранд нь согтуу очиж олны өмнө дарамтлах, хүүхдүүдээ зодох зэргээр сэтгэл санааны шаналал, байнгын айдас төрүүлэн зовоож тарчлаасан гэмт хэрэг үйлдсэн нь бас л хүүхдүүдийнх нь мэдүүлгээр батлагджээ. Эхнэр Ц.Э нь “ би нөхөртэйгөө 28 жил амьдарч байна, нялх биетэй байхад хаяад явдаг байсан, би хоёр хүүхдээ гэртээ төрүүлж өөрөө эх барьж авсан, намайг хардаад бүх хувцсыг маань хайчилж байсан, ажлаасаа буугаад гэртээ ирэхэд хэнтэй янхандсан бэ гээд хувцас урдаг, нүцгэлээд зураг авдаг, 2013 онд хотод 1000 ээжийн баярт оролцоод ирэхэд уруул сэт цохисон, энэ  сар шинийн өмнө нүүр лүү өшиглөж хөх няц болгосон, дараа нь хоолой боосон, тамхиа нуруун дээр унтраадаг” гэж мэдүүлжээ. Охин Б.З нь үүнийг баталж “аав архи уухаараа агсан согтуу тавьж биднийг дарамталдаг, ээжийг ажлаасаа ирэхэд хэрүүл өдөж зоддог, үсдэж дараад дэвсэх өшиглөх зэргээр зоддог, гичий, янхан гэх мэтээр доромжилдог” гэжээ. Охин Б.О нь “аав байнга архи уудаг, согтохоороо ээжийн хаана нь ч хамаагүй цохидог, аавтай байхад байнгийн дарамт шаналалтай хэцүү байдаг” гэж мэдүүлсэн гэнэ. Шүүх харгис этгээдийг зургаан сар баривчлах ялаар шийтгэжээ
 

NUUTS.mn